時任沙頭角分區指揮官、警司陸振中被指前年在粉嶺熟食中心殘廁，三度非禮女下屬，包括強迫對方口交，陸振中另涉在不足一個月後，於區內危險駕駛及襲擊3名下屬，他否認7罪受審，今（14日）在區域法院續審。事主X在辯方盤問下稱，第3次事件發生前遭被告拍醒，她曾揮手及表示「唔去」廁所，她指「被告係一個警司⋯⋯佢嘅權力，你知唔知係幾咁大呀？喺一個沙頭角分區裏面，佢可以話係山寨王呀，我只係一個好微細、好微細嘅一粒塵咋」。
此外，辯方亦質疑假如事主「咬實棚牙」，被告的陽具不會進入其口腔，X激動落淚，反問道：「（被告）重複又重複做啲膽大包天嘅行為，佢係一個警司嚟㗎，我有冇咁嘅勇氣去反抗佢呀？冇人係會想像到一個你身邊嘅人會侵犯你。」她又激動謂：「我同我男朋友一齊4年我都守身如玉。」指被告對她的所作所為，「我冇一刻係情願」。由於下午開庭後，控方表示事主不斷作嘔，法官將案件押後至明早續審。【案件報道結集】
被告陸振中（43歲，警察）否認7罪受審。3項「猥褻侵犯另一人」罪控罪指，被告於2022年6月22及23日，在粉嶺聯和墟街市熟食中心傷殘人士洗手間內3度非禮女子X。陸另被控各1項危險駕駛、襲擊他人致造成身體傷害、有意圖而導致身體受嚴重傷害及普通襲擊罪，均於同年7月15日在粉嶺一停車場內發生。被告涉危險駕駛、襲擊女子X令她造成身體傷害、意圖導致男子蔡文浩身體受傷、襲擊男子賴文顯。
盤問下庭上嚎哭 手震感不適需短暫休庭
辯方大律師鄭明斌繼續盤問X，問及第3次非禮事件、2022年6月23日凌晨約12時的情況。X確認，她趴在飯桌上休息時再遭被告拍醒，她曾經揮動左手以示不願意，庭上播放閉路電視片段，辯方着X指認她揮手的一刻，X補充指「唔止當刻話唔想去」，其後亦有表達過，即辯方質疑道：「啫係有多過一次㖭？」
X解釋：「要逐格逐格去睇（片），我先講到俾你聽，我當時係幾咁唔想去廁所。」她又大哭稱：「我當刻唔識去處理，我又唔敢反抗，被告又咁大隻，我又飲咗酒，已經身體其實係好唔舒服，如果我有能力嘅話，我已經搵咗我男朋友嚟接我喇⋯⋯」X答畢後在庭上嚎哭，又言手震和手痺感不適，法庭因而短暫休庭。
指被告權力大 自比只是微塵感恐懼擔心
再開庭後，辯方繼續指示播閉路電視片段，看到事主X被拍醒後站立。X解釋：「上級喺度同我講嘢，我當刻即時反應就係企起身。」她表示當時感到震驚，心想為何要去廁所，加上認為「自己有手有腳，唔使你帶去廁所」，然而被告是其上級，因此當被告站立時，在旁的督察蔡文浩亦隨即站立，X稱：「睇下阿Sir有咩吩咐指示。」
辯方關注X是否基於尊重上司而站立，X稱「可以咁講」，辯方即質疑X在數秒前才揮手以示不願去廁所，X同意站立時有揮手，亦有說「唔去唔去」，辯方追問次數，X表示當時沒有數算，但肯定曾明確表達自己不願去廁所。
此時，X再次落淚：「被告係一個警司，我（案發時）出嚟做咗嘢一年都未夠，佢嘅權力，你知唔知係幾咁大呀？喺一個沙頭角分區裏面，佢可以話係山寨王呀，我只係一個好微細、好微細嘅一粒塵咋，你知唔知我幾咁擔心恐懼？所以發生咗呢啲事情，我可以點呀？你不如教我⋯⋯我係一個女仔嚟㗎咋，雖然我係一個警察。」
X強調已盡力保護自己，但絕非容易開口談起此事，繼續哭稱：「我喺度都要好有勇氣講出嚟，我已經連續3日腦海係咁回憶回憶，我辛苦咗兩年，但係事情仲未完結，不斷回憶回憶，睇片睇片，我真係好辛苦，但係我可以同邊個傾？我淨係可以同我自己呀！」暫委法官勞潔儀表示明白X感不適，但她作為警員理應知悉法庭程序，必須播放相關片段，着X盡量控制情緒，聽清問題後作答，以讓程序更快完成。
遭質疑沒向男友求救 事主稱當時已無能力思考
辯方繼續盤問，再次問及事主為何不離開現場，X稱思想上很想離開，但她已醉醺醺、腳步浮浮，甚至無能力致電男友求救，反問如何能獨自離場，眼見同僚持續喝酒5至6小時都不肯完場，她只能趴在飯桌上休息。辯方關注X言下之意是否「虛弱到連打電話俾男朋友都打唔到」，X稱十分抗拒酒精，卻在被告威迫下「杯杯清」，因此已無能力思考。
辯方指出，事實上當晚11時45分左右，X的男友成功與她通電話，X確認曾通過一次電話，她有向男友表示自己酒醉，身旁的督察蔡文浩接過電話，與其男友相約在何處接她。
辯方遂質疑X為何不向男友求救：「證人呀，喺受過兩次嚴重侵犯之後，接到自己男朋友電話，你唔係應即刻同佢求救？」辯方又模仿事主哭聲：「或者叫佢嚟救你接你，嗚？」X指，現場有更高級的指揮官，亦有同僚沒喝酒，但現場無人為意到被告不下一次帶她入廁所，她感到絕望，亦不懂如何在通話中向男友講述事件，故在回家途中告知男友。
不過辯方指，早前X聲稱如有能力會致電男友前來接她，但通電話後無這樣做，質疑：「難道你冇能力話畀男朋友聽？救我、接我，兩個字咋喎。」X重申已解釋當刻的心情。
被告夾硬夾實 重複又重複做膽大包天行為
至於第三次在殘廁內發生的事，辯方再次關注口交的情況，X稱被告以手按她的頭，「我個嘴掂到佢陽具」，辯方即反問：「所以呢，會自動打開你個口？」X表示當時身體軟弱無力，「被告夾硬挃，其實會挃得到落去，強姦啲人都係夾硬令受害人陰部撕裂啦」。
辯方指出，嘴唇張開不等同牙齒分開，直言「你可以咬實你棚牙㗎嘛，如果你咬實你棚牙，佢嘅陽具唔會進入到你口腔之內」。
X再次落淚，答指：「其實佢咁大隻，我會俾佢打死，佢已經夾硬攬實我、夾實我，再搵隻手㩒實我個頭，重複又重複做啲膽大包天嘅行為，佢係一個警司嚟㗎，我有冇咁嘅勇氣去反抗佢呀？我有勇氣，我當日即刻已經報案喇，我唔使忍氣吞聲咁耐呀，呢兩年嚟我都好辛苦呀，但我唔想有第二、第三、第四個受害人呀，你明唔明呀？佢係一個警司，佢係我嘅上司，係我認識嘅人，佢咁樣對我呀，我俾到咩反應你呀？冇人係會想像到一個你身邊嘅人會侵犯你㗎！⋯⋯我可以做咩呀？我孤立無援，好多人同我講『你可以咁樣做』，但唔係咁㗎，你唔係我呀！」
X又激動謂：「我同我男朋友一齊4年我都守身如玉，你唔好話被告錫我嗰啲行為我會接受呀！我冇一刻係情願！」X不停抽泣，由於她情緒激動，法庭提早半小時午休。
今午開庭後，庭上聽到身在證人欄屏風後傳來事主X的嘔吐聲，警方案件主管又將嘔吐袋交予事主，控方之後表示，事主不斷作嘔，法官於是將案件押後至明早續審。【案件報道結集】
法院：區域法院
法官：暫委法官勞潔儀
被告：陸振中
控罪：猥褻侵犯、危險駕駛、襲擊他人致造成身體傷害、有意圖而導致身體受嚴重傷害、普通襲擊
案件編號：DCCC137/2023
如欲接收每日報道整合，請在訊息欄內填寫電郵地址
