已停運的《立場新聞》被控「#串謀發布煽動刊物罪」的案件，今（23日）在區域法院續審，署理高級助理刑事檢控專員伍淑娟就「47人初選案」的背景盤問鍾沛權，提到法庭處理初選案首度提堂時「直踩」至凌晨，是符合《國安法》所指盡快處理危害國安案件，鍾沛權稱審批文章時沒有判斷。控方再指，當時律政司反對47人保釋、再覆核獲批保釋者的結果均是跟足程序，「從來冇（人）話有違反程序」，鍾稱沒有印象，但律政司過往少有即時覆核保釋結果，該次做法引起爭議。控方繼而追問鍾，律政司是否跟足程序，鍾表示，若狹義地判斷是否依程序、依法，他會同意，但「依法唔代表一定合乎公義，唔代表一定合理」。【立場被控煽動刊物案報道結集】
主控稱連日盤問常生誤會 致「不必要拉長咗」
今早甫開庭，主控伍淑娟表示盤問多天，發現大家經常互相誤會，「不必要拉長咗」，重申盤問必然會問及有利控方的事情，但另一目的是澄清事實，「有時澄清咗不必要再糾纏落去」。伍又指，「你話我rephrase（改述），追問再追問，但其實我問緊程度問題，或者我唔明⋯⋯你傾向估我問問題目的，如果你估目的先答可能影響可信性⋯⋯」。伍稱，希望鍾講出審批文章時的想法。鍾回應指，有時無法憶起審批文章時的想法，或者「分唔開」屬當時判斷抑或現時設身處地回想當時的想法。法官郭偉健稱，若然無法憶起可以直說，毋須加以修飾。
伍引述《立場》一篇文章〈【特寫】英國多個城市集會聲援47人 參加者多申BN(O)：我們不會忘記〉指，其中「許之（編按：智）峯喺集會發言」，另有人在集會期間唱「願榮光歸香港」及叫喊「光時」口號。鍾沛權表示，有印象當時不少海外港人透過集會遊行聲援初選案被告。伍續問鍾，會否記得自民主派人士因「35+初選案」被捕後，美國、歐洲議會等表示會制裁中港官員？鍾表示記得曾有外國制裁中港官員一事，但是否與初選案相關則沒有印象。
伍指，初選案被告首度被帶上庭時，曾在初選投票的60萬人理應「嬲到震喎，投一個可行（的議會）戰線推動五大訴求，但你拉晒呢班人，失望、恐懼、嬲到不得了，即係連個戰線都冇埋喇，最後一線希望都冇晒」。鍾認為不止於60萬人有上述情感，皆因「呢47人被落案檢控造成嘅震撼喺香港，我會形容係非常巨大」。
被選案被告首提堂踩通宵 控方指符國安法公正及時辦理原則
伍續就初選案首度提堂的情況問鍾，包括法庭一直處理各人的保釋申請，直至被告楊雪盈暈倒才休庭，質疑「即係話如果唔係楊雪盈暈倒，可能會通宵直踩？」鍾表示沒有判斷。
伍指，一方面有人認為政府不可原諒、聆訊過程令各被告難受，但事實上根據《立場》的報道，「法庭係盡快處理、盡踩嘅⋯⋯直踩踩到半夜三更，呢個係符合《國安法》裏面所講嘅原則。危害國家安全控罪（相關案件）係要公正、及時辦理，呢個原則」。鍾稱沒有印象審批文章時有此判斷，較深印象是有報道提及被告「冇衫換、冇涼沖」等。
控方指47人若定罪可判終身監禁 好大潛逃風險「我驚都會走啦」
伍續指，控方之所以盡快將被告帶上庭，基於他們的潛逃風險大，鍾稱不記得當時有否判斷；伍又指，控方反對47人保釋時，必然會講出反對理據，而原因包括有證據指稱某些被告勾結外國勢力，鍾指得知悉控方有表明反對理由，但對後者沒有印象。伍續指，47人所面對的顛覆國家政權一經定罪可判處終身監禁，「姑勿論呢啲被告有冇干犯控罪，姑勿論被告是否承認自己有干犯控罪，一定好大潛逃風險，終身監禁⋯⋯我驚都會走啦」。鍾表示「當時完全冇咁嘅想法」。
伍又提到，當時從新聞見到各人對初選案提堂的觀感很差，問鍾直至他被捕當天，是否「從來冇（人）話有違反程序」？鍾稱沒有印象。伍指，有被告獲准保釋後，律政司即時提覆核亦是「跟程序做」。鍾則指程序引起爭議，惟伍表示是兩回事，「有冇濫用係一回事，但有冇根據程序係一回事」。鍾表示，律政司過往少有採取此做法，因此當時引起爭議，亦令人感到意外。
伍遂指，事實上律政司並非全數覆核成功，有被告仍獲准保釋，保釋被拒者亦有陸續向高院申請保釋，當中有人成功，包括鄒家成，但後來鄒家成違返保釋條件須再次還柙。鍾表示「因為我喺荔枝角（收押所）見到佢，所以好深印象」。
伍續指，終審法院於2021年就《國安法》保釋門檻作解釋後，壹傳媒創辦人黎智英向高院申請保釋被拒，但終院僅為「處理法律」，並非處理黎的申請，問鍾會否同意。
伍淑娟 （伍） 鍾沛權 （鍾）
鍾：過程叫官方鍾意用嘅說法——依法、依程序。我知法律界、民間有好多爭議，關於保釋門檻，《國安法》底下有好唔同嘅演繹。
伍：但至少睇到而家，（律政司）都係跟晒程序啦。你唔同意演繹係一回事，但程序上面跟足。
鍾：好狹義講依程序、依法我同意，但起點本身大家都覺得有爭議⋯⋯《國安法》立法冇諮詢、冇辯論⋯⋯起點引起質疑、好大嘅不安，圍繞國安法保釋門檻大幅度收緊，質疑持續至今。
伍：當然啦，每一件事都有兩面嘅⋯⋯社會上仍然有一班人（覺得）《國安法》有用，幫我哋止暴制亂，有兩面意見㗎嘛。
鍾：我同意⋯⋯依法唔代表一定合乎公義，唔代表一定合理。
伍：至少牌面上跟足程序做。
鍾：同意過程根據某啲程序、某法例去處理⋯⋯有一條法例比你依法做一啲嘢，依法唔代表冇濫用。
伍又指，部分人被還柙後沒有再申請保釋，「中間係有啲程序可以俾你哋去申請擔保嘅，只不過你唔去申請啫」。鍾回應指「我嘅個案係吖，冇錯」。【立場被控煽動刊物案報道結集】
法院：區域法院
法官：法官郭偉健
被告：BEST PENCIL（HONG KONG）LIMITED、鍾沛權、林紹桐
控罪：串謀發布及／或複製煽動刊物罪（第200章《刑事罪行條例》第(10)(1)(c)條）
法律團隊
辯方：資深大律師余若薇及大律師黃卉儀
控方：署理高級助理刑事檢控專員伍淑娟、署理高級檢控官徐倩姿
案件編號：DCCC265/2022
