林卓廷等涉721暴動|重看直播片見一男遭數白衣人襲擊 林庭上哽咽抱歉未能保護遇襲者

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(6日)在區域法院續審。林卓廷今午續自辯,庭上播放林卓廷Facebook直播片段,顯示在白衣人衝入閘之前,一名黑衣男子在付費區外遭數名白衣人襲擊,林自言不敢「跳出去保護嗰個人」,深感抱歉。

他在庭上坦言感到無力,並哽咽謂:「見到咁多市民咁樣畀佢哋打,畀佢地咁多人圍毆,而我做唔到幾多嘢囉⋯⋯你見佢哋仲耀武揚威對住鏡頭,正面向住你繼續打人。嗰個係元朗港鐵站呀,周圍都係閉路電視,香港交通運輸,重要基建嚟㗎嘛,我嗰時個無力感係好重,同埋覺得極其荒謬囉,點可能係咁㗎?香港唔應該係咁㗎嘛」,審訊明續。

本案7名被告為林卓廷(43歲)、庾家豪(35歲)、陳永晞(37歲)、葉鑫昇(31歲)、鄺浩林(26歲)、尹仲明(48歲)及楊朗(26歲)。

除了叫「唔好郁手」 我仲可以做咩呢

庭上續播放林卓廷Facebook直播片段,辯方大律師黃錦娟指,片段聽到白衣人到場後,林曾叫喊「唔好呀」,林解釋,當時希望白衣人「唔好埋嚟」。至於他叫喊「唔好郁手」及擺出示意停止的手勢,在於「驚佢真係打人」。林指,其間他曾叫其他人「企後少少」,亦指當時拉後一名年輕男子,以免爆發衝突。

黃錦娟又問林,為何林在不同階段多次叫喊「唔好郁手」。林回答:「​​唉,我仲可以做咩呢?⋯⋯當時諗唔到真係仲有咩好講,一路打緊人,我盡量講啦⋯⋯等對面知道,喂,我哋有人睇住你㗎。」此外,他亦曾叫喊「哇,啲黑社會真係惡呀」、「影住佢」,以示意冼卓嵐拍攝閘外的白衣人,同時希望對方收手。

林續指,他在過程中曾被水樽擲中,法官陳廣池質疑為何直播沒有拍「Close up」,林表示當時正叫閘外人士停手,同時要着閘內者企後,根本無心神指示冼卓嵐如何直播,又言「我都好荒亂㗎,都唔知點算好㗎⋯⋯個局面好大鑊㗎喇」。

林亦確認,曾有人着他戴上頭盔,但他隨即拒絕,又言「你戴、你戴」,林解釋「我唔想畀人哋覺得我係有備而來」。

覺得極其荒謬 香港唔應該係咁㗎

直播片段顯示,一名黑衣男子在付費區外遭數名白衣人襲擊,林稱當時付費區內人士相當激動,「做咩咁多人打一個人啫,鬧佢哋打人囉」。黃錦娟遂問林「當時有冇咩做到?」林自言:「我,我唔敢跳出去保護嗰個人囉,真係好⋯⋯」他一度停頓並嘆氣,續指:「好抱歉呀真係。」

陳官問林是否需要紙巾,林從書記手中接過紙巾後,繼續作答。林哽咽道:「嗰吓其實無力感係非常之重,見到咁多市民,咁樣畀佢哋打,畀佢地咁多人圍毆,而我做唔到幾多嘢囉,最初階段一味叫佢哋(白衣人)唔好郁手,係冇用囉。跟住過左一輪,我就諗用鏡頭影住佢,希望阻嚇佢哋囉,但似乎佢(哋)對呢啲係完全無所顧忌,口罩都唔使戴㗎,你見佢哋仲耀武揚威對住鏡頭,正面向住你繼續打人。嗰個係元朗港鐵站呀,周圍都係閉路電視,香港交通運輸,重要基建嚟㗎嘛,我嗰時個無力感係好重,同埋覺得極其荒謬囉,點可能係咁㗎?香港唔應該係咁㗎嘛?」陳官隨後一度休庭讓林休息。

再開庭後,陳官表示林有一番感言,亦有所感觸,關注林是當時抑或現在感觸。林指,他當時在現場感到無力,更認為「香港唔應該係咁」,至於感觸則是「剛才嘅感觸」。

黃錦娟追問林不敢保護黑衣男子的原因,林坦言形勢太兇險,「見住佢哋咁樣圍毆、追打嗰個人,我諗我出到去,我會更加危險囉」。

閘內人「圍埋一齊」 官問為何仍喊「唔好落單」

對於片中有人叫喊「唔好落單」,陳官一度不解謂:「佢哋喺閘內㗎嘛,已經不落單㗎啦,所以我唔係好明,大家都圍埋一齊喺度㗎啦,你明唔明我意思?」林解釋,印象當時部分閘內人士向後縮,有人則上前責罵施襲者,故此人群並不集中「啲人走嚟走去嘅其實」,由於形勢瞬息萬變,說出此話的人僅提醒各位盡量不要分散。

林續解釋他叫喊「頂住佢」的原因,指當時付費區外有人打開了輪椅出入口,心想若然白衣人持棍衝入閘,後果不堪設想,故此喝止對方,並叫大家「頂住」。他又指萬一後退,白衣人便會衝入內,於是又叫喊「唔好退,唔好退,千祈唔好退」、「一退就追入嚟㗎喇」。

在此階段,片中顯示一名女子曾行近閘前,陳官關注「點解冇人拉住前面個女仔?」,林強調當刻無留意該女子,「我個心神就係個閘口打開咗,我好緊張閘口會湧啲人入嚟,一湧入嚟,一、兩秒之內就到㗎喇,所以係極之緊張嘅情況」。

林在庭上又確認,畫面見到其後有3人在付費區游走,他其後得知其中一人為身穿「Press」字樣反光衣的何桂藍。黃錦娟指出,林沒有如早前般「將啲人拉後」,林重申當時擔心白衣人從已打開的閘口湧入,加上現時從片段見到,他們亦非太近閘口,「我理唔到咁多嘢㗎喇」。

審訊明續,林繼續作供。

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們