林卓廷等涉721暴動|車站控制室便衣警當晚匯報近F出口閘機「超過幾十人」聚集 官質疑少報 警庭上指視覺上「超過100人」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,案件今(16日)在區域法院踏入第18天審訊,控方應辯方要求,傳召另一位當晚在元朗站車站控制室觀看閉路電視的便衣警員出庭。警員確認,當晚10時42分透過畫面見到追逐及打鬥事件,有持續向元朗警區行動室匯報。至於大批白衣人由形點商場經F出口進入元朗站、部分人持棍及籐條的畫面,警員稱「䁽過一眼,見到有人揸嘢」,便轉了鏡頭觀察其他聚集情況。

直至晚上10時49分,他再向行動室上報近F出口閘機位「超過幾十人」聚集,獲回覆「安排緊人處理,繼續報情況」,遭法官陳廣池質疑畫面所見人數不止數十人,警員在庭上指視覺上有逾百人。陳官又關注警員有否匯報現場人士「分兩派甚至多派㗎喎」,警員確認曾匯報「分咗兩派人,當中有啲着白色衫,有啲唔係着白色衫嘅」。【林卓廷等涉721暴動案報道結集】

本案7名被告為林卓廷(43歲)、庾家豪(35歲)、陳永晞(37歲)、葉鑫昇(31歲)、鄺浩林(26歲)、尹仲明(48歲)及楊朗(26歲)。

白衫人持棍及紙牌由形點入元朗站 證人同意「都幾明顯」

證供顯示,7.21當晚8時15分共有兩名便衣警於元朗站車站控制室觀看閉路電視,分別是偵緝警長盧吉相、偵緝警員顧子健(音譯),盧今日午飯前作供完畢,控方因應辯方要求傳召顧子健出庭。

顧確認,案發時駐守元朗警區情報組,7.21之前無接獲情報指有人將會「吹雞」,當日亦無收到情報指元朗不同地方有白衣人士聚集,直至晚上10時許,他首次透過閉路電視畫面見到白衫人士持棍及紙牌由形點商場進入元朗站,「同時間幾個一齊着白色衫、揸住啲嘢」,辯方關注是否「都幾明顯」,獲顧確認。

辯方續問,他觀看的螢幕共有多少格畫面?他稱超過30格,辯方聞言稱:「云云30格都留意到有一班白衣人入嚟?」顧稱「只可以講,我個一刻係睇到囉」。

F出口大批白衣人持棍及籐條 警「䁽過一眼」後轉鏡頭

辯方播放多段閉路電視片段,問顧對該些畫面有否印象,整合部分內容如下:

時間辯方措述證人回應
22:40 – 22:42見到追逐及打鬥事件、有人跳欄,但不知道跳欄者是否從F出口方向離開,有持續向行動室匯報
22:42 – 22:43「打鬥完,白衣人走咗」不記得
22:48「F商場入口有好多白衣人,有啲揸住棍,有啲揸籐條狀物體」「䁽過一眼見到有人揸嘢」後,轉至另一閉路電視鏡頭
22:49已匯報有「超過幾十人」聚集,當中分為兩派

辯方播放晚上10時40至42分的閉路電視片段,他確認有即時將情況上報行動室,「因為已經有啲追逐同打鬥發生咗」。辯方再播放10時42分的情況,問顧有否看見有人跳欄,顧確認當時有看到,但不記得他們是否從F出口方向離開。顧強調,當10時42分發生打鬥後,「我哋都focus咗喺呢個鏡頭,其實係一連串事件,我哋都會繼續報(俾行動室)」。

辯方繼續播片,指畫面顯示「打鬥完,白衣人走咗」,顧表示不記得有否看過,辯方質疑:「你唔關心嘅咩?既然有打鬥,似乎仲有啲當時參與嘅人喺大堂。」顧解釋「有機會轉咗去另一個鏡頭」。

辯方又問顧有否留意晚上10時48分的情況,「有冇留意F商場入口,有好多白衣人,有啲揸住棍,有啲揸籐條狀物體」,顧指當時正留意付費區的聚集人士,辯方再問是否沒有留意這批白衣人,顧便稱「笠過一眼,見到有人揸嘢,(之後)轉咗去另一支閉路電視鏡頭」。閉路電視顯示,在相若時間(即晚上10時48至49分),有大批白衣人於F出口及G出口之間的售票機附近經過,但顧表示當時並非觀看這個畫面。

警員上報「超過幾十人」聚集 官:點會幾十人咁少?

辯方播放片段顯示近F出口的閘機情況(晚上10時49分),顧確認看過相關畫面,並匯報指「超過幾十個人聚咗喺度」,遭陳官質疑道:「就咁睇個畫面,點會幾十人咁少呢?點解報幾十人嘅?」顧稱已不記得確實上報的數字,陳官遂問他從視覺上的觀察有多少人,顧稱「超過100人」。

:有冇報畀DOR(行動室)聽,100人之間有分兩派㗎喎,甚至多派㗎喎,唔係100人同一組人,100人不同組別,個情況好唔同㗎喎,啱唔啱?

:啱。

:有冇進一步資料講畀DOR聽呢?

:有,隨後呢件事件發生落去,有啲衝突同埋打鬥,我亦都再打畀DOR同佢講返當時情況係分咗兩派人。就而家呢個閉路電視畫面(22:49)有好多人聚集,確實人數點樣報畀DOR就唔記得,當中有啲着白色衫,有啲唔係着白色衫嘅人士。

行動室稱「安排緊人處理」 警員理解將派人手到元朗站

顧又確認,他上報行動室後獲回應「安排緊人處理,繼續報情況」。辯方問顧如何理解行動室的回覆,顧答指「以我理解,即係佢哋會派人嚟處理⋯⋯我同佢匯報元朗西鐵站嘅衝突事件,應該就係派嚟元朗西鐵站喇」,至於行動室何時調派人手或派出何人,他表示不知道。

辯方續關注,顧是否不曾獲指示要離開控制室「出去幫手」,顧同意,「我收到指示就係DOR會安排警察處理,我哋繼續留喺度監察實時閉路電視情況」,並持續向行動室匯報。辯方盤問完畢,顧明日將接受控方覆問。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們