林卓廷等涉721暴動|被質疑對元朗有人搞事「置身事外」 黃偉賢指控方「本末倒置」 警方應執法卻沒做 怎可反稱他沒盡力趕至制止事件

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(18日)在區域法院續審。控方續盤問林卓廷一方證人、時任元朗區議員黃偉賢,質疑黃在事件中對警方似乎有「過大信心」,輕視了當天或「有人入元朗搞事」的消息,黃否認,並指若警方防患於未然,理應一早致電鄉事,「19號已經通知咗警方,警方要做嘢,係唔需要等到21號嘅」,加上如人手不足,更應以此防止白衣人出現,「除非話畀我聽,警方冇做過嘢啦」。

控方向黃指出控方案情,指他一直深信「有人入元朗搞事」,卻不予理會,任由事件發酵,「你係故意唔留守喺元朗,令自己置身事外」,亦無應警方要求勸喻林卓廷不要入元朗。黃一概否認,聲音略為顫抖稱:「講到我同聚集既白衣人有聯繫咁樣喎,咩叫置身事外呢?同埋我覺得真係本末倒置喎,警方應該採取一啲執法行動,而冇做到呢方面嘅工作,反而指我冇盡力趕入去,制止呢件事發生咁,我呢個絕不同意。」黃作供完畢。【林卓廷等涉721暴動案報道結集】

官問黃曾否想過被利用「放流料」

控方續盤問黃偉賢,並關注是否因白衣人相信「有人入元朗搞事」所以才「吹大雞」,換言之入元朗的人或會與鄉事「吹大雞」的人對抗或衝擊,黃同意兩者相關,不過他早已告知鄉事不會有人入元朗,相信鄉事亦會從連登得知此事。控方即指「其實如果有人暗地裏安排,你唔會知」,質疑黃相信無人入元朗的基礎薄弱。

此時,法官陳廣池追問黃:「你有冇諗過,有人利用你呃鄉事派呢?」黃反問:「點樣利用我呀?」陳官解釋,意指有人將「流料」告知黃,黃再把「流料」轉告鄉事派,黃表示沒有想過被人利用,因為一直都沒有正式消息指元朗區有遊行集會,陳官質疑一個非法活動又怎會公告天下,黃重申若非正式活動,他並不會知道。

否認輕視事件與對警力有過大信心

控方另提及2019年發生的其他大型事件:6.12有大批示威者佔據立法會周邊道路,其後演變成警民衝突;6.21有大批示威者包圍警察總部,導致總部員工不能進出;7.1有大批示威者衝擊立法會,本於大樓內布防的警員亦要撤離,並問:「你同唔同意呢啲衝擊事件,警方都唔可以喺短時間內平息到?」黃同意。

控方續指,早前黃稱曾向警方反映要求增加警力,但獲回覆人手足夠,但若有大型事件發生,警方會借調屯門機動部隊的人手,是否顯示警方要借調才可解決元朗人手不足問題?黃同意警力不足。控方遂問:「你都同意喺嗰段時間,警方對於大型社會事件,都唔係立刻可以平息吖。其實你同唔同意,今次事件,你對警力似乎有過大嘅信心,完全輕視咗7.21當日可能真係有人入元朗搞事嘅消息?」黃不同意。

黃解釋指:「19號已經通知咗警方,警方要做嘢,係唔需要等到21號嘅⋯⋯如果警方防患於未然,佢應該知道呢個消息,已經打電話問啲鄉頭係咪吹大雞呀。我相信警方一定知㖭啦,我咁霉都收到呢啲消息,如果警方係想當日冇其他村民喺度聚集,我一路都話只需要打幾個電話,呢個同人手多定少係冇關嘅,如果警方一路都話佢哋唔夠人手,佢更加應該用呢個方法防止白衣人出現,除非話畀我聽,警方冇做過嘢啦,所以出現呢件事。」

控方再指「所以我話你對警方有過大信心,所以決定唔留守囉」。黃重申一直都不認為元朗有兩班人對峙。

指控故意不留守且沒勸喻林卓廷

控方向黃偉賢指出案情。

控:你相信或者可能相信有人入元朗遊行或搞事,只不過你選擇不予理會。

黃:不同意。

控:因此冇盡早返回元朗,任由事件發酵。

黃:不同意,我唔知我早啲返入去,我有乜能力制止呢件事。

控:其實你係故意唔留守喺元朗,令自己置身事外,所以鄧警長請你勸第一被告(林卓廷)唔好入元朗,你亦唔打算勸喻,只表示無能為力。

黃:不同意⋯⋯講到我同聚集既白衣人有聯繫咁樣喎,咩叫置身事外呢?同埋我覺得真係本末倒置喎,警方應該採取一啲執法行動,而冇做到呢方面嘅工作,反而指我冇盡力趕入去,制止呢件事發生咁,我呢個絕不同意。

陳官遂問:「你對鄧警長十分失望啦?」黃同意。陳官再問,既然黃有元朗指揮官的卡片,為何不嘗試致電指揮官。黃稱卡片只有寫字樓電話,另相信鄧警長會向指揮官匯報。陳官再問:「你十點已經對鄧警長好失望啦嘛,點解唔試圖打畀指揮官?」黃解釋「夜晚喎,指揮官唔會喺寫字樓㗎喎」,陳官續問那麼有否致電副指揮官,黃同樣指沒有其手提電話號碼。

黃偉賢作供完畢。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們