林卓廷等涉721暴動|被問曾否想過離開車站付費區 林卓廷稱出閘猶如「送死」 且保護工作未完 不能置市民於危難之中

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(7日)在區域法院踏入第25日審訊。林卓廷繼續自辯,被其代表大狀問及曾否想過離開付費區,他稱出閘猶如「送死」,上月台又擔心白衣人衝入閘,加上警方一早知悉「吹大雞」,他亦已聯絡元朗警區警民關係組警長,一直期望警方數分鐘內到場,他指保護市民的工作未完,「我點能夠喺佢地危難之中自己走咗去呢?」

法官陳廣池關注,林卓廷有否着莊榮輝或冼卓嵐致電警方「追佢哋嚟」,林稱沒有,並答指:「警察已經知啦嘛,咁大件事,仲要靠我啲同事去追佢?」陳官遂追問:「有冇人阻止你打電話叫警察吖?」林再稱:「當然冇啦⋯⋯不過我已經打咗啦嘛,同埋我知道警察已經知,我再打電話去,個作用喺邊呢?後尾我知道,無數咁多個電話打過去㖭啦。」審訊午續。

本案7名被告為林卓廷(43歲)、庾家豪(35歲)、陳永晞(37歲)、葉鑫昇(31歲)、鄺浩林(26歲)、尹仲明(48歲)及楊朗(26歲)。

開閘門紥辮男 疑為領頭人之一

林卓廷踏入第3日自辯,他今憶起當時一名紥辮、側面剷青的男子曾打開供輪椅出入的閘口,該人站得特別前,亦一直與身旁人士溝通,似乎為「帶頭」角色,是領頭人之一。林指,當打開閘口後,該男子更一度行入付費區,做出手勢挑釁付費區內的人出去,林遂大叫「唔好出去」,又叫付費區內的人「唔好追出去」。林指,經喝止後,該男子才後退回閘外。

庭上續播放林卓廷Facebook直播片段,法官陳廣池關注林為何叫喊「落嚟幫手」。林解釋,較早前有白衣人曾打開供輪椅出入的閘口,一度行入付費區,他認為是危險的先兆,「如果白衣人覺得付費區入面嘅群眾係好容易嘅襲擊對象呢,會令到佢地更加大機會衝入嚟」。他指,當時有男士站在連接大堂與月台的樓梯,遂呼籲他們下來阻嚇白衣人,保護身在付費區內的乘客。

陳官隨即質疑:「咁啲乘客點解唔走呢?你憑咩話佢係乘客呢?」林答指,身在西鐵站內的人士「自然係乘客」。

出閘上月台均兇險 感覺已被包圍

辯方大律師黃錦娟於是指,當時林在付費區內已逗留12至13分鐘,問林曾否想過離開。林形容是身不由己,當時只有兩路可走,「出閘係極其兇險啦,出面全部白衣人,如果出去我覺得係送死囉⋯⋯上月台嘅話,白衣人衝入嚟,嗰條樓梯咁多人,亦都係好危險㗎嘛,當時嘅感覺係,我哋俾人包圍咗㗎」。

林續指:「佢(警方)一早已經知道呢個吹大雞嘅事件啦⋯⋯咁我又聯絡阿鄧sir佢亦都話有便衣睇住㗎喇,加埋嗰度係元朗地鐵站,冚唪唥都係閉路電視⋯⋯我期望佢哋(警方)幾分鐘內會到⋯⋯我入元朗都係希望市民可以安全返屋企⋯⋯我保護市民呢個工作都未完成,佢地仲係咁危險,我點能夠喺佢地危難之中自己走咗去呢?如果當時有警察嚟到,話有一條安全路線可以走,我即刻毫不猶豫,呼籲大家跟警方嘅逃生路線走囉。」

陳官質疑,既然林聲稱要保護市民,為何沒有拉住在閘前徘徊、持機拍攝的女子?林指,該女子僅「棟住喺度」,有別於早前一名年輕男子有遇襲危險。林又言當時太多事情兼顧,無法事事完美。

有冇打俾警察? 咁大件事仲要去追

陳官遂關注林卓廷有否着莊榮輝或冼卓嵐致電警方「追佢哋嚟」。

法官陳廣池() 林卓廷(

:曾幾何時,有冇自己諗過,叫姓冼、姓莊再打畀警察追佢哋嚟?

:我冇,因為警察已經知啦嘛,咁大件事,仲要靠我啲同事去追佢?我覺得作用係冇囉。我親自打左去畀元朗負責聯絡議員嘅警民關係,一個好有經驗嘅聯絡人員⋯⋯其實係相當慌亂,有時莊榮輝喺邊我都唔知,我仲要搵佢,冼卓嵐又揸住手機一路拍住⋯⋯我當時其實有一點後悔,如果我有個水晶球知道係咁嘅話,我會叫冼卓嵐(用他的手機)login我Facebook Account⋯⋯我留返手機仲可以求救⋯⋯

:有冇人阻止你打電話叫警察吖?

:當然冇啦,法官閣下,不過我已經打咗啦嘛,同埋我知道警察已經知,我再打電話去,個作用喺邊呢?後尾我知道,無數咁多個電話打過去㖭啦。

反話喊「夠膽唔好走」 官表示質疑

陳官續問林有否想過疏散市民上月台乘車離開,林直言當時沒有安全的逃生路線,「如果有嘅,我梗係呼籲大家,唔好話分批啦,大家即刻走啦,有秩序地離開」。他重申一旦落單遭圍毆「可以搞出人命㗎」,再反問道:「我冇一個安穩嘅逃走路線,我點敢做呢個呼籲呀?」

至於片段聽到林叫喊「你哋班X街,你夠膽唔好走,警察而家嚟緊」、「你千祈唔好走呀」,林形容只是反話,「有時講嘢就係咁啦,個心好想佢快啲走」。

陳官再次感不解,質疑為何是反話。林表示:「真係反話嚟㗎,佢走呀,我都唔知幾咁高興啦⋯⋯如果我跪喺度佢肯走呀,我即刻跪喺度呀。如果我調轉嚟講,警察嚟緊呀,你快啲走呀,會唔會更加古怪呀?」

審訊午續。

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們