林卓廷等涉721暴動|被問事態嚴重沒再聯絡警方或當區議員 黃偉賢自言想不到會發生超出想像的「無差別襲擊」 警方若不想事發致電鄉頭已可

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(18日)在區域法院續審,控方開始盤問林卓廷一方的證人、時任區議員黃偉賢。控方質疑,黃在案發當日發現事態嚴重後,為何沒有聯絡元朗區議員、相關立法會議員或元朗警區警民關係組警長,黃指「警方已經知道呢件事,知道好幾日㖭」、「如果警方係唔想出任何事,佢根本唔需要用警力,佢打幾個電話畀鄉頭就得」。控方一度追問原因,黃稱:「你問多我100次、1000次、1萬次,我都係咁講,我諗唔到會發生超出我想像嘅無差別襲擊事件,呢個我發夢都諗唔到有咁嚴重嘅問題。」

此外,控方指「吹大雞」不一定意指「晒馬」,「某鄉鄉事會主席添丁,鄉頭都係吹雞叫村民去恭賀㗎」,黃隨即否認,旁聽席傳來笑聲。法官陳廣池指:「其實大家都知道『吹雞』呢兩個字,有少少黑社會術語,佢有特殊意思⋯⋯變咗嚟計,如果你將呢兩個概念(混為一談),當咗食盤菜都當吹雞,恕我所言,有少少貽笑大方。」控方聞言稱「唔好意思,我成日都叫朋友吹雞食飯」。審訊午續。【林卓廷等涉721暴動案報道結集】

林卓廷一方上周五傳召黃偉賢出庭,黃指2019年7月19日接獲廈村村民來電指「收到風,21號鄉事吹大雞」,他理解是「元朗6條鄉,條條鄉都要動員」,他曾致電鄉事區議員求證,對方回應「冇咩嘢嘅,我哋表吓態啫,警告啲年輕人唔好入嚟元朗搞事,唔挑釁就冇嘢㗎喇」,黃理解鄉事派只是「Show Quali」或「晒馬」。

控方稱成日吹雞食飯 指鄉事添丁可「吹雞」恭賀

控方今指,鄉事吹雞或如常人理解「召集其他人」,不一定是「晒馬」,即遭法官陳廣池打斷指「佢唔係吹雞嗰個」,控方遂修訂提問。

法官陳廣池() 控方() 黃偉賢(c

:你都講鄉村好多聚集,某鄉鄉事會主席添丁,鄉頭都係吹雞叫村民去恭賀㗎?

:唔係!

:其實大家都知道「吹雞」呢兩個字,有少少黑社會術語,佢有特殊意思⋯⋯我強調唔係話畀專家證人口供,但大家知道吹雞有特殊意思。變咗嚟計,如果你將呢兩個概念(混為一談),當咗食盤菜都當吹雞,恕我所言,有少少貽笑大方。

:唔好意思,我成日都叫朋友吹雞食飯。

:相信而家無論電影又好,其他故事又好⋯⋯譬如「Mark哥」(電影《英雄本色》角色)咁講嗰啲嘢慢慢變成日常用語,你用呢個概念去睇,你就知你呢條問題唔係咁恰當,我唔准你問呢條問題,事實上嚟計,你係用錯咗概念。

黃曾聯絡鄉頭 獲知只為表態不覺會出事

控方續指,黃聲稱見到有人背部被打,才覺事態嚴重,那麼他有否聯絡元朗區議員或相關立法會議員,請他們協助或一同商討解決方法?黃稱沒有,他解釋說:「因為第一,警方已經知道呢件事,知道好幾日㖭,警方亦都同我講 ,佢哋有部署有安排,我亦都聯絡鄉事頭頭,似乎都話冇咩嘢嘅,表態嘅啫,我從來都唔覺得會出事嘅。如果警方唔想有事發生,根本唔會有白衣人聚集喺雞地呢件事發生,警方只需打幾個電話畀啲鄉事⋯⋯」

控方再追問原因,黃重申:「你問多我100次、1000次、1萬次,我都係咁講,我諗唔到會發生超出我想像嘅無差別襲擊事件,呢個我發夢都諗唔到有咁嚴重嘅問題。」控方遂質疑「其他人唔聯絡都唔緊要喇,(時任元朗區議員)麥業成住喺雞地,你都冇搵佢」。黃同意僅在晚上9時致電過麥,向他表示有市民聲稱在雞地見到白衣人,至於晚上10時後的情況,黃認為以他沒有下載社交軟件都知道,他相信麥更早已接獲資訊,故此其後沒有再致電麥。

至於黃覺事態嚴重後,打算與林卓廷一同入元朗,控方關注他們有沒有共識,相約在何處會合,黃稱只叫林「唔好出站」,一來容易碰面,二來站外已有襲擊發生,擔心林出站遇上白衣人會被打。控方質疑黃是否假設林會一直在站內等他,黃認為「理論上係,因為我都話跟住佢入」。

控方遂不解:「你平時約人都係咁樣㗎?唔講時間,唔講地點⋯⋯點解你哋約到咁混亂?呢個係我真心唔明。」黃直指「唔係真係煞有其事去約」,陳官追問原因,黃解釋「唔係一早有計劃約埋一齊入去吖嘛」。

33年議員生涯 沒見過如2019風暴

黃續稱,他與杜嘉倫步行至中環站,欲乘港鐵回元朗,途中遇駕私家車的元朗居民,於是登車,他稱記得在朗屏站外連儂牆見過該市民,但沒有問其姓名。黃指,由於中環多處有堵路,需時繞路才能離開中環,翌日凌晨1時許才抵達元朗。

控方續問,黃在兩個小時的車程內,有否再致電元朗警區警民關係組鄧警長,黃稱沒有。控方追問原因,黃答指「仲打嚟做咩啫,出左事嘍,我作為議員又好,市民又好,我將我所有知嘅訊息都第一時間通知警方,我亦都相信警方有部署有安排,我都講過,如果警方係唔想出任何事,佢根本唔需要用警力,佢打幾個電話畀鄉頭就得,呢個係我做咗元朗區議員33年,可以肯定講嘅說話」。

陳官此時指:「我相信你33年間區議員生涯,你都未見過2019風暴。」黃同意,陳官再問:「咁打個電話何害之有呢?」黃指早前已多次致電話,惟直至當刻,「警方應承我啲嘢,好似乜都冇做咁」。審訊午續。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們