Search
Close this search box.

林卓廷等涉721暴動|法官問白衣人在車站一度散去原因 第三被告陳永晞稱打人明顯犯法 逃離現場是合理反應

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(26日)在區域法院續審。第三被告陳永晞續自辯,談及當晚在元朗站月台向下望時,見到8至10名白衣人追打一名女子,他跑到大堂後,目擊白衣人襲擊上述女子及其他市民,他發現「自己冇乜嘢做得到」,只可喝止對方「唔好打人」,其間有白衣人持棍指嚇他,他即時退後,白衣人便轉移視線。就白衣人一度散去,法官陳廣池關注被告是否知悉此事,陳認為打人明顯犯法,白衣人逃離現場亦是合理反應,陳官關注:「入面可以仲有其他人俾佢打㗎嘛,可以未打完㗎嘛,佢全部人都打晒?」陳重申只認為「佢哋打完就走」。

此外,就陳形容其後閘內有人與閘外者「講緊嘢」,他於是勸閘內的人退後,陳官追問:「咁你覺得佢哋噓寒問暖、互相稱呼、稱兄道弟,定係大家火爆味重呢?」陳答指有火藥味。審訊午續。【林卓廷等涉721暴動案報道結集】

第三被告陳永晞昨午開始自辯,提到當晚10時許與友人前往「B仔涼粉」食糖水,途經鳳攸北街休憩處對上行人天橋時,留意到約百名白衣人聚集,大部分手持棍狀物,其中一人行前以棍指向他們,並問二人的身分,未幾另一白衣人行前,陳答指「我哋街坊,落嚟食糖水」,對方便指「如果係街坊的話就快啲離開喇,今晚呢頭會有嘢」,陳便與友人前往元朗站,打算提醒會途經雞地的人士。

陳今續指,他與友人經形點I抵達元朗站K出口,及後決定拍卡入閘。法官陳廣池關注陳為何作出該決定,陳表示,由於早前在雞地遇到白衣人,故打算到月台提醒在元朗站下車的人「要小心」、「避開危險」。

衝落樓梯想阻止襲擊 惟只能站着喝止

辯方在庭上播放元朗站月台的閉路電視片段,關注陳為何突然跑向樓梯。陳憶述,在月台逗留5分鐘後,付費區便傳來大叫聲,他當時十分緊張,故行向樓梯欲了解情況。陳官追問是「咩聲」,陳稱是大叫聲,陳官指「大叫都有嘢,唔係唱緊高音㗎嘛」,陳表示距離太遠,沒有仔細聽內容。

陳續指,他在樓梯位置向下望向大堂付費區,「見到有8至10個白衣人追住一個女士打,攞住棍」,他繼續落樓梯。陳官關注:「啫係個女仔走緊,後面啲白衣人追,就未打到嘅?」陳直言事發在一瞬間,他並不清楚。陳官又問他為何衝落樓梯,陳表示當時「諗住睇吓有冇方法可以止到襲擊」。陳官追問有何方法,陳稱一心想阻止,但「反應唔切」想不到方法。陳官再問:「啫係你淨係衝落去啫?冇諗住點樣做?」陳同意他當時未有詳盡計劃。

陳稱,當他跑向襲擊發生的地點後,目睹白衣人襲擊早前見到的女子及其他途人,「發現自己冇乜嘢做得到,都係喺度睇住件事發生」。陳官關注:「咁你企咗喺度呀?」陳自言想阻止白衣人打人,一直在想辦法,陳官問有否喝止對方,陳表示曾嘗試叫「唔好打人啦」,他亦曾拉後其他人。

候警到場期間 曾拍攝地上血跡及斷棍

陳提到,他站在柱旁邊,其間有白衣人以棍指嚇他,他隨即後退,庭上播放《明周》的片段,顯示有白衣人手持紅旗向陳揮動。陳官追問該白衣人指嚇甚麼,陳表示已不記得,陳官追問對方有否說粗口,陳再指不記得。陳官遂問:「白衣人揸住紅旗行向你之前,你驚唔驚?」陳表示「嗰刻諗住想襲擊快啲停止,但又冇話好驚,因為覺得襲擊冇針對我」。陳官再指:「你講俾法庭聽,呢位白衣人嚟接觸你之前,你見到白衣人打緊另一批人,你都不驚,因為你相信襲擊唔係針對你?」陳同意。

庭上播放片段,見第3被告陳永晞(綠衫者)在元朗站內一條柱旁,有白衣人持紅旗向陳揮動。(圖片截取自《明周》網上影片)

直至白衣人散去,陳行至傷者所在處,並到客務中心向職員投訴,要求職員報警及索取急救箱,佢聽到身旁有途人聲稱已報警,故此他沒有再打999。

法官陳廣池() 被告陳永晞(

:你知唔知點解啲白衣人離開咗?

:我相信佢哋打完人,好明顯係一個犯法嘅行為啦,犯完法,佢哋逃離現場,相信係好合理嘅反應

:入面可以仲有其他人俾佢打架嘛,可以未打完㗎嘛,佢全部人都打晒?

:我唔清楚⋯⋯我覺得佢哋打完就要走。

:你同法庭講,佢除咗打個女人之外,仲打其他人㗎嘛,其他人都瞓低晒喺度?

:我當時觀察只有一、兩個傷者。

陳指,他等候警方到場期間,曾拍下地上的血跡及斷棍以作紀錄。陳官追問:「你等緊警察,冇嘢做,你就影相喇?點解唔影個女人呢?俾人打傷,流埋血。」陳表示當刻沒有想過拍攝女子的傷勢。

見閘內男子與閘外對話 感覺火藥味勸退後

直至10時52分,畫面見到身在付費區的陳曾行向一名男子,陳稱當時見到揹背囊的男子與閘外人士「喺度講緊嘢」,陳自言有所關注,故上前勸男子遠離閘機,「行返後少少」較為安全。陳官聞言表示「你講得好文雅」,並問當時二人是「對話」抑或「對罵」,陳認為是「對話」,陳官遂問:「咁你覺得佢哋噓寒問暖、互相稱呼、稱兄道弟,定係大家火爆味重呢?」陳同意感覺有火藥味,但已不記得有否說粗口。

陳續指,他在付費區內行來行去,等候警方到場。陳官表示,從畫面所見,「閘內嘅人群都幾多㗎喎」,並問陳當時大約有多少人,陳一度指自己身在其中,無法計數,陳官再着陳估計人數,陳便指畫面見到不下100人。

陳官再指,畫面當中有人打開雨傘,問陳是否知悉原因。陳稱,因閘外人士將雜物掟入閘內,相信開傘為保衛自己。陳官再問:「咁點解你要等警察到呢?」陳表示「我覺得警察嚟到,事件好快平息⋯⋯我就可以好安全離開」。審訊午續。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明、高級檢控官岑穎欣
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們