林卓廷等涉721暴動|林卓廷稱見男子背部籐條痕照片知「出事」 致電元朗警民關係組警長 獲回覆「一直有便衣喺度睇住」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,案件今午(5日)續。林卓廷繼續自辯,他指當日民陣遊行結束並晚膳後,本打算回家,惟見到男子背部有籐條痕的照片等才發現「出事」,並非如元朗區議員黃偉賢所指的「劇本Fit兩下」,他及後更從黃偉賢口中得知有黑社會正從屯門入元朗,林遂致電元朗警區警民關係組警長提出強烈質疑,表明會入元朗監察及「𥄫實」警隊,當時獲警長告知「佢哋一直有便衣喺度睇住」。

林強調,希望以立法會議員身分向警方施壓,令他們盡快驅趕黑社會,並指打算留在站內,「叫站入面嘅人唔好出站住」。

林卓廷繼續自辯,談及2019年7月21日民陣遊行結束後,與冼卓嵐、莊榮輝、郭㙟豐晚膳,並打算各自回家,他與冼、莊同路回沙田,然而林擔心元朗有事發生,「我個心覺得硬係唔係好安穩,我左諗右諗就覺得,自己返屋企好似好衰仔咁」,故向冼及莊提議前往美孚站,兩人沒有異議。

不是「Fit兩下」 是圍毆毒打

林又指,慎防並非人人都收到消息,故於Facebook發出第一則帖文(發帖時間:21:38)「返元朗的朋友,務請小心,懷疑黑社會已部署,請保護好自己和身邊朋友」,他形容是「嘗試敲第一個警號」。

林憶起,發文後便從網上看到一名男子「背脊全部都係籐條痕嘅相片」,以及一段有男子遭白衣人士包圍、「有人對佢郁手郁腳」的片段,林其後知悉上述的事主為蘇姓廚師。林直言:「我覺得出事喇,唔係黃偉賢同我講嗰個劇本Fit兩下,唔係咁囉,係變咗圍毆、毒打。」

林擔心情況惡化,故聯絡時任保安局局長政治助理劉富生,但對方無接聽電話;林又着冼搜尋元朗警署電話,但都不成功,於是兩度致電區議員黃偉賢,在首個通話中告知對方:「出事喎,你有冇睇到有個人被人打到背脊開花,好嚴重喎,唔係晏晝你同我講咁樣Fit兩下喎,開始出事喇喎。」

黃偉賢叮囑 「唔好出西鐵站」

林指,當第二次致電黃便得知「有批屯門嘅落埋去,佢有提過啲黑社會份子嚟嘅,確實字眼我唔記得佢點講喇,即係有黑社會背景嘅人落埋去元朗」。林告知黃他會入元朗「睇住個情況」,黃尚未回到元朗,特意叮囑林「小心啲,唔好出西鐵站」。

辯方大律師黃錦娟關注,為何黃着林不要離開西鐵站。林解釋,當日下午起接獲的消息,就是有白衣人在元朗市一帶集結,「如果出西鐵站去到元朗市同佢哋相遇,咁會好危險㗎嘛,我咪諗住入到元朗西鐵站,留住喺站入面,叫警察盡快驅散啲人,市民咪可以返屋企,咁我諗住叫站入面嘅人唔好出站住」,他於是再發第二則Facebook帖文(發帖時間:22:15),提到「收到可靠消息,現時在元朗的懷疑黑社會份子,相當部分來自屯門,大家小心」。

到場為監察「𥄫實」 不擔心警力不足

林指,他最終透過黃取得元朗警區警民關係組警長的聯絡方式,致電對方提出強烈質疑,「你哋警方由得嗰啲白衣人集結咁耐,由黃昏去到成9點幾10點,而家開始打人喇喎⋯⋯我入嚟監察定𥄫實,叫佢盡快驅散西鐵站外一帶黑社會,保障市民出入安全」,當時警長稱警隊知悉白衣人集結的情況,「佢哋一直有便衣喺度睇住」。林憶起,警長曾詢問「你真係要入嚟呀林生?」,林隨即反駁「我梗係要入嚟睇住你做嘢啦,咁耐都唔做嘢」,對方稱會轉告上司。

黃錦娟引述警長早前的證供,並問及林的回應。黃指,警長聲稱林在通話中曾問警方的人手及部署。林否認,並指當天與黃偉賢通電話時,黃指早在2至3日前已接獲消息,「警隊冇理由唔知當日元朗吹大雞」。林又言不擔心警方人手不足,因有需要時其他警區可到場增援,加上警隊有充足裝備及訓練,應對持籐條的白衣人「唔覺得需要好大量嘅人手先至處理到囉」。

沒提不需保護 警方需履行職責

黃錦娟續指,警長供稱已告知林,如果他入元朗,警方需時前往西鐵站保護他,而林回應「我唔使你哋保護」便掛線。林再次否認,並指他希望以立法會議員公職身分施壓,令警方盡快驅散黑社會,「我就係擔心,我同佢講我去元朗站,佢就淨係派人處理元朗站一帶情況」,故此不曾提及會前往哪一個站。

此外,林稱早在2019年6月底,他於立法會外的天橋遭數十名親政府人士包圍,有人揚言「要掟我落天橋」,最終在警方保護及開路下才能離開。黃錦娟關注,林是否意指他亦需要警方保護。林確認,並表示所以他一定不會提「唔使警方保護」,「呢個佢職責嚟㗎嘛,我點會叫佢唔履行佢職責啫」。

法官陳廣池關注,既然林在6月有「唔好嘅經歷」,他有否刻意告知警方「我需要你哋保護」?林表示沒有,因當時無打算接觸黑社會或白衣人,相信只要留在西鐵站便安全,加上以往沒有大型衝突在港鐵站發生,故認為港鐵站相對安全。

林指,他最後與冼、莊決定由美孚站入元朗,快將抵達元朗站時發出第三則Facebook帖文(發帖時間:22:41)「【打擊元朗黑份子】我已聯絡元朗警方,表示我和同事正前往元朗,要求警方立即打擊在元朗站和朗屏站一帶黑份子,確保公眾,尤其年輕人安全」。

林稱,他當時兩手揈揈,甚至沒有揹上背囊,除了冼及莊外,不認識車廂其他乘客。林表示,本來已傾向在元朗站下車,直至列車抵達元朗站,車門打開時聽到有人叫「下面打人呀」、「黑社會打人呀」,隨即在元朗站下車。

審訊明續,林繼續作供。

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們