林卓廷等涉721暴動|林卓廷稱僅打算留在元朗站內 法官質疑不出站危險仍在 林:我認知冇人咁大膽去地鐵站公然打人

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,案件今(6日)踏入第24天審訊,林卓廷繼續自辯,指未踏入付費區之前,不知悉白衣人是否身在西鐵站,但他只打算留在站內了解,遭法官陳廣池質疑林不出站,不代表白衣人不會入內。林卓廷直言:「當時我嘅認知,冇人咁大膽走去地鐵站,咁樣公然打人㗎⋯⋯成班人衝去地鐵站,咁大規模咁打⋯⋯香港歷史上我諗係前所未見。」

庭上另播放林卓廷Facebook直播,就有人在元朗站問林「何君堯同啲白衫影相,喺公園嗰度」、「你過唔過去呀」,林認為該人「挑戰緊我敢唔敢過去」,又形容對方「覺得自己好勇」。陳官反問道:「你唔叫佢,你咁勇,你自己去?」林聞言稱:「咁我咪多條罪?煽惑佢喎我驚!」此時旁聽席傳來笑聲。審訊午續。

本案7名被告為林卓廷(43歲)、庾家豪(35歲)、陳永晞(37歲)、葉鑫昇(31歲)、鄺浩林(26歲)、尹仲明(48歲)及楊朗(26歲)。

沒考慮換衫免被打 因外貌本已易認

林卓廷今續自辯稱,列車尚未到元朗站前,有一名男乘客表示看到網上信息,並關注是否有白衣人在元朗聚集,當抵達元朗後,月台有另一男子邊走邊叫「下面有人打人」、「落去幫手」,林形容當時氣氛緊張。

林從閉路電視片段認出自己、莊榮輝及冼卓嵐步出車廂,亦同意3人所穿的都是黑色衫。他憶起,當時在站內見到一堆雜色衣服,「我記得有人擺咗啲衫喺度嘅,就話唔好着黑色衫呀,換衫呀,如果唔係啲白衣人打人呀」,不過他們3人沒有換走黑衫。辯方大律師黃錦娟追問原因,林笑言:「我根本唔會考慮囉⋯⋯因為我太易認喇,換唔換衫啲人都認得我㗎啦,換衫仲好似無私顯見私⋯⋯同埋我係唔打算出呢個西鐵站。」

林補充指,他起初不打算入元朗,但收到消息指穿黑衫者入元朗有遇襲風險,才會前往元朗。不過,他聽取元朗區議員黃偉賢的意見,打算不離開西鐵站,留在站內了解,並認為此為最好的決定。

大規模地鐵站打人 「香港歷史上我諗係前所未見」

黃錦娟關注,以林當時的認知,白衣人是否不在西鐵站?林指,只知有白衣人在雞地聚集,但無消息指該批人士已進入或快將進入西鐵站,而且他之前已聯絡警方,着警方盡快驅散元朗站及朗屏站一帶白衣人。法官陳廣池質疑道:「你嘅講法咪元朗站有白衣人囉?」林強調,當時僅着警方在元朗站同朗屏站一帶執法,當時並不認為白衣人身在付費區。

法官陳廣池() 林卓廷(

:你點知白衣人唔會入西鐵站呢?你唔出,唔代表白衣人唔入,個危險仲喺度㗎。

:當時我嘅認知,冇人咁大膽走去地鐵站,咁樣公然打人㗎,呢個係我當時嘅認知囉,你問我呢個認知正唔正確呢,事後睇返,當然唔正確,原來可以發生咁樣嘅事情,呢個超出我當時嘅想像。

:你話冇人夠膽喺地鐵站公然打人?

:成班人衝去地鐵站,咁大規模咁打,我係唔敢相信囉⋯⋯咁嘅規模,香港歷史上我諗係前所未見。

:如果有大批人公然喺西鐵站以外打人,你就覺得唔出奇嘅?你呢個邏輯呀?

:法官閣下,喺當時嘅社會環境,成批人公然打人,我親自經歷過吖⋯⋯喺警察面前公然毆打立法會議員㖭,我當然唔贊成呢啲事情啦,但當時個社會就係咁吖嘛。

目的為緩和局勢 故不回應「打X佢」

林在庭上確認,當日將手機交予冼卓嵐,由他持機進行Facebook直播,一來可讓公眾知悉他如何履行公職,二來「如果有啲咩事,對自己都有保障」。庭上播放該段Facebook直播片段,聽到林到場後曾問「打嗰啲人喺邊」,林指欲知悉施襲者的位置,再評估形勢,而他問及「有咩架撐」後,有人答指「木棍同刀仔」,在林詢問下,該人再指是「木刀」,林發現並非單單是籐條,若然有刀便非常危險。

林確認,當時在場聽到一男子叫「打X佢」,但他沒有回應,他解釋指:「第一,我唔會同意佢,因為我係想個局勢緩和,大家安全返屋企,如果我回應佢,話唔同意佢,我同佢鬧交,咁就更加無謂,我純粹想處理好件事咋嘛。」他又指,若警方盡快驅散黑社會,當變得平靜及安全,他、莊及冼「3個一齊返屋企就最開心囉」。

林自言當時亦感惶恐及緊張,「我都口窒窒」,他認為該些木棍上或有施襲者的指模及DNA,屬證據之一,可供警方調查,於是着他人不要觸碰地上的木棍並「擺返低」。

何不着他人找何君堯 林:「煽惑佢喎我驚」

片段另聽到一名男子稱「何君堯同啲白衫影相,喺公園嗰度,我哋過唔過去呀」、「你過唔過去呀,林卓廷」,林答當時答「嗱,過去呢就準備打交」,對方聞言稱「唔係打交,同何君堯傾」。

林指,他不認識該男子,但認為一旦過去會發生嚴重衝突,於是警告並着對方冷靜。陳官指,該男子似乎在煽風點火,林稱「佢挑戰緊我敢唔敢過去,感覺到有啲來者不善」,又認為對方不是他的支持者,「通常支持我嘅人,唔會咁同我講嘢㗎,客氣禮貌好多」。

陳官追問林認為對方是甚麼人,林稱與早前揚言「打X佢」的男子為同類人,「佢哋覺得自己好勇嘅人囉」。陳官問林是否「覺得佢好勇」,林澄清「我唔係咁講,係佢哋覺得自己好勇」。陳官於是反問:「你唔叫佢,你咁勇,你自己去?」林聞言稱:「咁我咪多條罪?煽惑佢喎我驚!」此時旁聽席傳來笑聲。

林又指,當時曾思考這個方法「有冇得諗」,「如果佢(何君堯)識嗰批人,叫佢去撳住佢哋(白衣人)囉」,未幾數十名白衣人便陸續抵達。審訊午續。

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們