林卓廷等涉721暴動|時任元朗區議員黃偉賢供稱 719已知「鄉事吹大雞 「元朗6條鄉,條條鄉都要動員」 警方回覆「有部署,得㗎喇,有安排」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(15日)在區域法院踏入第30天審訊,林卓廷作供完畢,林一方傳召辯方證人、時任元朗區議員黃偉賢出庭。黃指,7月19日已從廈村村民口中得知「鄉事吹大雞」,他理解「元朗6條鄉,條條鄉都要動員」,他遂致電元朗警區警民關係組警長,獲回覆「有部署,得㗎喇,有安排」,黃認為「佢一啲驚訝都冇,好似都胸有成竹」。黃及後致電鄉事區議員求證,獲悉「我哋表吓態啫,警告啲年輕人唔好入嚟元朗搞事,唔挑釁就冇嘢㗎喇」。

及至7.21當晚9時,黃陸續接獲市民來電,包括稱自下午6至7時起已有白衣人在雞地集結,但沒有警察在場,另有黑衫年輕人遭「輕輕Fit腳」,他理解猶如「玩馬騮」,黃兩度致電警長,警長稱「派咗便衣去」。黃深信警方有部署及安排,便衣警在場亦可維持治安。直至晚上約10時林卓廷來電,黃看到「有人背脊俾人打得好花」的照片,他才覺事態嚴重,並決定入元朗。【林卓廷等涉721暴動案報道結集】

法官憂審訊有機會超時 明言不希望年底才結案

甫開庭,法官陳廣池關注本案踏入第30日審訊,原定預留審期至本月底,若其餘6名被告維持原有立場選擇自辯,憂慮有機會再超時,明言不希望年底才審結本案,「時間可能會揸得緊啲」。陳官又言,盡可能會「繼續前進」以審理本案,之後訂後續審期時未必會遷就所有人的檔期。

現66歲的黃偉賢供稱,他居於元朗超過60年,曾任區議員逾33年,首次於1988年當選,直至2021年離任,2020年曾任元朗區議會主席,他另在1991至1995年任立法會議員。黃指,在任區議員時不時與政府部門溝通,包括警方,而他大多與警民關係組聯絡,間中亦會與指揮官或副指官溝通。代表林卓廷的大律師黃錦娟關注,黃偉賢在2016至2019年任期內主要與哪位警民關係組警員聯絡,黃稱其中一人為鄧姓警長(即本案控方證人之一),他形容與鄧「都好熟」,他有鄧的私人手機號碼,「有時都講吓笑、傾吓偈」。

黃偉賢指97後 鄉委會主席有現任黑社會「頭頭」

黃又言「我同元朗嘅鄉事、村長都好熟悉」,鄉事委員會主席亦會尋求他協助。辯方再問,以黃所知,元朗鄉事是否有黑社會或相關背景人士?黃稱,有鄉事甚至俗稱「鄉頭」的鄉事委員會主席都有黑社會背景。

黃解釋,在1997年之前,許多鄉事或鄉事委員會主席已「金盤洗手」,警方指揮官出席村內或鄉的活動前亦相當小心,警民關係組事前會了解出席該場合的人士,以避免與黑社會相關人士同台拍照,但97年後有所改變,「97年之後嘅鄉事委員會主席,仲係現任黑社會啲『頭頭』,呢個係我做咗咁耐區議員,係想像唔到」。

黃憶起,約於2019年7月19日前,有鄉事區議員致電他問「有冇人嚟元朗遊行呀」,黃回覆沒有收到相關消息,對方又在WhatsApp向他傳送了一張似是海報的圖片。黃表示,因當時沒有下載連登及Telegram,他遂致電同事查詢,獲告知「假嘢嚟嘅」。他記得元朗警區警民關係組鄧姓警長亦有向他了解此事,黃回覆「冇呢方面嘅消息」。

官問:要鄉頭才叫「吹大雞」?嘍囉只是「吹雞」?

直至7月19日,他接獲廈村村民來電指「收到風,21號鄉事吹大雞」,他理解是「元朗6條鄉,條條鄉都要動員」,若有人於21日到元朗遊行,他們便會驅趕。法官陳廣池關注該村民會致電黃,黃表示不知道為何致電他,但一直都有不同村民致電他「講佢村嘅嘢我知」,陳官即指「但而家係通風報信吖嘛」。

陳官關注:「要鄉頭先可以叫『吹大雞』?其他嘍囉又好,淨係『吹雞』?」黃確認,並補充指所謂「鄉頭」即鄉事委員會主席,同時亦是區議會的當然議員。陳官追問:「你點知6個鄉頭同一時間吹嗰樣嘢係『吹大雞』呢?」黃答指,因當時村民的用字是「鄉事吹大雞」,而非「廈村鄉鄉頭吹大雞」。

黃續指,他聽畢村民所指後,隨即致電鄧姓警長,將消息告知鄧,他形容鄧「都好平靜」,並指「有部署,得㗎喇,有安排」。黃稱:「我聽到鄧sir咁樣覆我呢,佢一啲驚訝都冇,好似都胸有成竹⋯⋯我相信警方收風多過我㖭,所以我冇再追問。」他補充指,過往曾就區內治安問及警方部署,警方都會以涉及行動細節為由而拒絕透露,「我都已經知道警方唔會講㗎喇,所以唔需要問」。

黃引鄉事區議員回應:表吓態啫⋯⋯唔挑釁就冇嘢㗎喇

黃稱,他之後致電鄉事區議員求證,對方回應「冇咩嘢嘅,我哋表吓態啫,警告啲年輕人唔好入嚟元朗搞事,唔挑釁就冇嘢㗎喇」,黃理解「表態」是「Show Quali」或「晒馬」,「年輕人」則為參與反修例活動的年輕人,尤其身穿黑衣。當他向幾位民主派議員查詢,他們亦指沒有元朗區外的人會於7.21當天入元朗集結。

至於7.21當日,黃稱當日前往港島監察遊行過程,中午過後陸續在WhatsApp收到白衣人聚集、「一咋咋籐條定竹支」的照片,因此當林卓廷致電他談及元朗有人動員及「打仔」,他遂告知林「佢哋表態啫,我諗佢哋應該按劇本辦事,只要唔挑釁佢哋呢,就唔會搞你」、「我諗最多係Fit你1、2吓嘅啫」,並指警方已有部署,着林不用擔心。陳官即問:「你認為係表態行動,Show Quali定懲罰行動呢?」黃認為是「警告」,陳官再問:「你認為,Fit你兩吓係警告啫?」黃確認。

黃稱,直至晚上約9時,他開始收到市民來電,「有元朗居民打電話俾我,話7點鐘返屋企嘅時候,見到雞地好多白衣人聚集,但係見唔到警察,問我有冇處理」,該居民聲稱嘗試報警「但打唔通」,黃隨即致電鄧姓警長,告知鄧雞地有很多白衣人聚集,「鄧sir話會搵人去睇㗎喇」。約10至20分鐘後,該居民再次來電問「點解咁耐都未有警察到㗎」,黃於是致電鄧查詢,獲告知「派咗便衣去㗎喇」。黃指,元朗警署距離雞地不遠「如果快嘅,揸車可以5分鐘到」,因鄧稱已派便衣到場,他遂繼續留在港島觀察。

黃指,他曾致電居於雞地鳳攸北街的元朗區議員麥業成,麥亦指雞地有許多白衣人,「食飯嘅時候,坐我隔壁枱都係白衣人呀」。麥更指「鳳攸北街側邊大廈管理公司,喺中午嘅時候派咗單張入居民信箱,單張講『提議地舖喺嗰晚提早關門,因為可能有事會發生』」。

市民見黑衫青年遭「輕輕Fit腳」 黃理解如「玩馬騮」

黃稱,當晚另接獲2至3個市民來電,指下午6至7時見到許多白衣人在雞地聚集,其中有人目睹身穿黑衣的年輕人途經該處時,「有人輕輕Fit吓佢隻腳,好似玩咁樣」,陳官質疑道:「早前話Fit兩下,而家特定部位喇?」黃稱「但市民形容係好輕手嘅啫」,他理解「好似玩馬騮咁」,似乎與早前得知的「表吓態」相符,加上便衣已到場,「有警察喺度,我相信警察一定會維持到治安嘅」。

黃指,以往在區議會會議曾向警方提出增加警力,「警方一路都話佢哋人手足夠啦,如果有大件事發生呢,佢哋會調動新界北嘅機動部隊過嚟幫手,所以我唔覺得元朗警力人手有問題」。他亦指,既然警方稱有部署有安排,「我冇理由唔信佢」。

直至晚上約10時接獲林卓廷來電,林稱有人在雞地遇襲,黃看到「有人背脊俾人打得好花」的照片,形容「自己睇到都好心悒」及「我都好驚」,當刻才發現事態嚴重,決定與林一同前往元朗。由於林先到,黃遂將鄧警長的聯絡方式交予林。

辯方問黃,林卓廷如此關心元朗的事,黃會否感到奇怪?黃直指不奇怪,「一個好嘅、好有承擔嘅議員,唔應該計較邊個區嘅工作,都應該要做」。黃指,他曾致電鄧警長,表明他與林卓廷會入元朗,但鄧沒有着他不要到元朗,亦無叫他勸林卓廷不要到元朗。

 ▋ 整合黃偉賢所接獲的消息

7月19日
廈村村民:「收到風,21號鄉事吹大雞」

警民關係組警長:「有部署,得㗎喇,有安排」

鄉事區議員:「冇咩嘢嘅,我哋表吓態啫,警告啲年輕人唔好入嚟元朗搞事,唔挑釁就冇嘢㗎喇」

民主派議員稱無消息指有區外人將於7.21入元朗

7月21日
(21:00後)市民先後來電稱「見到雞地好多白衣人聚集,但係見唔到警察」、黑衫年輕人遭「輕輕Fit腳」猶如「玩馬騮」

警民關係組警長先後指「會搵人去睇」及「派咗便衣去」

時任元朗區議員麥業成稱中午時份,鳳攸北街旁的大廈管理公司已將單張放入居民信箱,「提議地舖喺嗰晚提早關門,因為可能有事會發生」

(22:00)林卓廷來電稱有人於雞地遇襲

【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們