林卓廷等涉721暴動|控方盤問第5被告 當時是否覺得林卓廷「有領袖風範」 被告:「唔係好覺」、「真係冇呢個感覺」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,今(9日)踏入第43日審訊,第5被告鄺浩林續接受控方盤問。控方關注,當日是否只有林卓廷主動向圍觀者表示已報警,並叫大家不要出閘,「得佢一個有呢種姿態」,鄺同意。控方再問:「當時會唔會覺得第一被告有領袖風範?」鄺答指「咁又真係唔係好覺喎」,此時法官陳廣池再問:「啫係你唔覺得第一被告當時有領袖風範?」鄺表示「其實真係冇呢個感覺」。

控方另問及鄺對林卓廷的認知,鄺回答「男人」後,即引起多人發笑,陳官質疑「全世界都知佢係男人,冇人會話佢係女人㗎喎」,鄺澄清知道林是議員,但當時不知該名男子正是林。【林卓廷等涉721暴動案報道結集】

目睹受傷女子被人扶入廁所 確認第7被告有份

現年29歲的鄺浩林今第二日作供,昨午已踏入控方盤問階段,不過代表第7被告楊朗的大律師曾敏怡指,昨晚接獲當事人指示,有需要向鄺提問,控方不反對,法官陳廣池批准申請。曾指,早前鄺提到大堂目睹一名受傷女子,她其後被人扶入女廁,鄺確認當時有3至5人攙扶,當中有男有女。曾遂問,現時會否記得當中一人是本案第7被告楊朗,獲鄺確認。

高級檢控官程慧明繼續盤問鄺,關注他在2019年7月21日之前有否聽聞過林卓廷此人,鄺指「記得有聽過個名,但係你問我當時知唔知佢個樣或者外型,我真係冇印象」。控方指,在審訊當中固然會知悉林的樣貌,故問鄺當日有否見過林在元朗站大堂付費區出現,鄺指聽到林表示已聯絡元朗警區,閘外有黑社會,着人不要「笠亂」出閘,其後就再沒有見過林。

控方關注:「第一被告一個人主動向在場圍觀或者同佢一齊嘅人,講報咗警,大家唔好出去,係咪得佢一個人有咁嘅姿態?」鄺同意。控方再問:「當時得佢一個有呢種姿態,有呢少少領袖風範?」法官陳廣池質疑問題涉及兩件事,並令問題複雜化,故着控方重新提問。

控方:你知道嘅林卓廷係咩人? 被告:男人

法官陳廣池() 控方() 被告鄺浩林(

:當時會唔會覺得第一被告有領袖風範?

:咁又真係唔係好覺喎

:啫係你唔覺得第一被告當時有領袖風範?

:其實真係冇呢個感覺

:你當時知唔知係我哋當時嘅立法會議員?

:當時未知

:當時你係聽過林卓廷呢個名?

:係

:你知道嘅林卓廷係咩人?

:男人。對於呢個認知,淨係知佢係一個男性,但係佢係議員

庭上多人包括林卓廷、其他被告及旁聽人士聽畢回答後不禁發笑。法官陳廣池直指其答案無意思,「全世界都知佢係男人,冇人會話佢係女人㗎喎」。鄺重新解釋指,當時知道林是議員,但「當晚嘅我唔知道呢位男士係林卓廷先生」。

無留意林 指白衣人到場「情況唔容許再四圍望」

控方續問鄺有否在任何階段見到林「攞過好細嘅咪同其他人講嘢」,鄺表示沒有,因當時最留意閘外的白衣人。控方質疑:「你唔會睇吓佢哋咩人?你同佢哋一齊喎。」鄺依然表示沒有。

陳官追問原因之下,鄺稱「白衣人到咗之後,個情況唔容許再四圍望住」,加上他斷斷續續用手機拍攝,無刻意留意附近的人。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明、高級檢控官岑穎欣
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們