林卓廷等涉721暴動|控方盤問次被告庾家豪 指他面對白衣人時睜大眼情緒激動叫喊 官指「好似好興奮」 庾:只想「扮唔驚」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(20日)在區域法院續審,次被告庾家豪開始接受控方盤問,控方指庾向白衣人喊「嚟吖,come on」時睜大雙眼,眉毛挑起,情緒激動,庾指「唔想俾佢覺得,我哋弱過佢哋」,才會擺出不怕事的模樣。法官陳廣池稱,留意到庾正在笑,「至少外人睇有興奮狀態」,庾同意看似興奮,但實情只想「扮唔驚」,代表庾的大律師一度質疑陳官有引導之嫌,陳官反指辯方「寬己律人」。

控方續指,庾聲稱閘內人士「互相保護」,是否意指不會獨自對抗白衣人,庾答指「得我自己一個嘅話,我轉身跑啦,因為有我女朋友,有其他老弱婦孺,廁所有受傷嘅女人,嗰一刻我唔可以轉身跑囉,要做返一個男人應該做嘅嘢囉」,陳官聞言即指:「你有少少性別歧視,見唔見不是你女朋友嗰個女人,保護緊你㗎?佢推你向後,唔淨係男人先保護到人,女人都保護到人㗎嘛。」審訊午續。【林卓廷等涉721暴動案報道結集】

次被告庾家豪(案發時34歲,現39歲)續自辯,庭上播放林卓廷Facebook直播片,顯示白衣人在車廂襲擊的情況,有人多次大叫「唔好打」。

形容當時感絕望 情況似恐襲

代表庾的大律師李百秋今問庾當時的感受。庾直言:「好絕望囉,其實困住喺車入面,佢哋塞住門口,係咁打車入面嘅人,避都冇得避,走都冇得走⋯⋯現場啲女士、細路仔喺度喊,感覺好似恐襲咁,不斷有人喊,大嗌唔好打。」

庾指,當列車開出後,有人安撫哭泣的女士或小朋友,另有人替傷者簡單包紮,庾亦聽到有居於元朗的人商討如何回家。辯方最後問庾在案發前是否認識林卓廷,庾指只知對方是立法會議員,但不認識他;庾在案發前亦完全不認識同案5名被告。

控方接着開始盤問庾,由高級檢控官程慧明的副手、高級檢控官岑穎欣負責盤問。控方指,庾曾在閘機前方向白衣人稱「嚟吖,come on」,當時庾雙眼擘大,庾稱當然有。控方遂指,並非普通的擘大而是睜大,並問:「隻眼平時都係咁?」庾稱「我隻眼大細本身係咁大」。控方續指,但庾的眉毛似乎向上挑起。庾回答當時他正在說話,並指控方以截圖來提問不太準確。

控方續指,當時庾情緒激動。庾同意有別於平時的狀態,因當時白衣人正恐嚇閘內的人士,他不想讓對方知悉自己害怕,亦「唔想俾佢覺得,我地弱過佢哋」,故此會擺出「唔會咁怕事」的模樣。

被質疑引導證人 法官指辯方「律人寬己」

此時,法官陳廣池關注庾招手後再拍一拍手,問庾為何會拍手。庾稱,他招手純粹配合他所言,但無刻意思考拍手有何作用。陳官再問:「你同唔同意,你嗰時好似好興奮,興奮到你女朋友要推開你,你用隻手發開你女朋友,面容至少嚟計係笑緊,至少外人睇有興奮狀態。」庾同意看似是興奮,但實情是「想扮到我唔會驚」,並澄清該名推開他的女士不是他的女友,當時緊接有白衣人搖指示牌,幾乎撞中女友,所以他才會揈開該女士,趕快上前保護女友,陳官聞言稱「唔好意思」。

代表庾的大律師李百秋一度站立,質疑「興奮」所覆蓋的範圍很大,又質疑陳官看似在「Lead(引導)」證人。陳官不解其說法,明言他是以法官的角色提問,並給予被告解釋機會,正如被告糾正推開他的不是女友,「你用lead呢個字,我覺得你有啲似乎係『律人寬己』或者調返轉『寬己律人』,你自己成日lead人哋」。

陳官重申歡迎任何人糾正他,「我唔會話小心眼,我係法官,你挑戰我,我就唔鍾意」。李解釋:「我只係澄清你⋯⋯」,即遭陳官打斷謂:「你唔係第一次㗎喇,對法官嚟講,唔該你講『法官閣下』。」李隨後表示,本無意再提及此事,惟陳官此時卻質疑大律師不會無緣無故站立,並指辯方可提出反對或申請,如有膽量更可要求法官撤回問題,甚或提出讓被告再次解釋,李聽畢指「法官閣下當然啱啦」。

「做返男人應該做嘅嘢」 官:你有少少性別歧視

控方接着續提問,指庾當時「扮唔驚,嚇返佢哋」,有對立及反抗的狀態,庾重申只想阻嚇白衣人不要入閘。控方便指,一個人並無法阻嚇他們,庾同意,並說:「如果得我一個,相信即刻被人打咗。」控方指,因此庾早前供稱,若然閘內有愈多黑衣人群體,便不怕白衣人群體衝入,辯方一度反對控方以「黑衣人」來形容閘內者,控方重申就如開案陳詞般,「黑衣人」只是統稱,沒有任何貶損意思。

庾則認為,以付費區內的市民或乘客來形客較為適合,又指「呢度(片段畫面)好唔好彩地得我一個係黑色衫,如果咁樣形容,係白衣人群體㖭」。

控方稱,既然庾稱閘內人士互相保護,以其角度,「你應不會獨自對抗閘外的白衣人?」庾答:「得我自己一個嘅話,我轉身跑啦,因為有我女朋友,有其他老弱婦孺,廁所有受傷嘅女人,嗰一刻我唔可以轉身跑囉,要做返一個男人應該做嘅嘢囉。」,陳官聞言即指:「你有少少性別歧視,見唔見不是你女朋友嗰個女人,保護緊你㗎?佢推你向後,唔淨係男人先保護到人,女人都保護到人㗎嘛。」

控方再指,閘內其他人亦與庾一同對抗白衣人,庾指不會以「對抗」來形容,強調「我相信我哋都係受害者,需要保護大家,閘內人士比較前面啲可能會強硬少少⋯⋯後面好多市民好驚,後面市民係不停打999」。

控方稱,事實上庾不會獨自行動,而是與其他人一同行動。庾重申不認為閘內人士有合作。控方又指,閘內人士共同行動,「一齊行一齊嗌」,大家一同留守,互相壯膽,並且壯大聲勢。庾一概不同意。審訊午續。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們