林卓廷等涉721暴動|控方指庾家豪就地取材拾起水樽攻擊 庾否認並強調水樽掟向閘內地下 目的是拖延時間上前救人

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,7人否認暴動罪,今(20日)在區域法院續審,踏入第33天審訊。次被告庾家豪在控方盤問下稱,當時位處近F及G出口的閘機時,見有黑衣男子在閘外遭白衣人包圍,而眼前又有另一班白衣人朝該方向前進,他遂將水樽掟向自己前方地下,希望拖延時間,再上前救人。控方一度質疑「嗰度有人士俾白衣人圍,其實同你個人冇關喎」,庾重申不忍見人受傷,加上認為閘內人士需互相保護。

控方又指,後方的人士不可能不上前救人,庾直指「我冇諗到嗰度附近嘅人會唔會救佢,定袖手旁觀」,加上行近欄杆或被白衣人打中,需要一定膽量。法官陳廣池關注,庾是否意指「你唔知其他人有冇咁嘅膽量」,庾同意,陳官即質疑:「咁你會唔會低估其他人呢?」庾同意有此可能,但最終亦有6至7人上前救人。控方又向庾指出「你接唔接受,你係勇字當頭衝去救人呢?」庾稱「我唔認為」。審訊明續。【林卓廷等涉721暴動案報道結集】

次被告庾家豪第2天作供,續接受控方盤問,高級檢控官岑穎欣指,庾當天曾三度向白衣人招手,其中在第三次,庾更行至閘機前招手,控方向庾指出「其實你唔驚佢哋」。庾重申「我係驚,我喺度扮唔驚囉」。惟控方質疑,留在原地招手更為安全,庾稱即使行前亦非「近到佢會打到我嘅距離」。

聽到「啪」一聲 疑女友腳被水樽掟中

就庾昨供稱,當時的女友曾在欄位旁遭水樽擲中,控方關注庾是否親眼看到這幕,庾指沒有目睹擊中的時刻,只聽到「啪」一聲,並見女友望向自己的腳,及後水樽「碌」向欄杆附近,故認為女友是被水樽掟中腳。

控方遂指,從片段所見,當水樽碌至欄杆下方時,庾以右腳「撩返嗰水樽出嚟」,庾同意,控方亦質疑庾沒有關心女友的安全或有否受傷,庾指「我的確係唔夠關心我女朋友」,但當時女友仍繼續報警,相信「𠴱吓唔係咁應」,再者他不肯定水樽會否碌至白衣人一方,故此將水樽拉後。控方遂指「閘內嘅人如果走咗去執水樽,都可以掟去閘外白衣人度,再攻擊嘅啫,簡單嚟講,邊邊執到就邊邊用」,庾答指「咁你都可以咁講」,現時在庭上深思熟慮,他同意兩方都有機會擲物,不過當刻只想白衣人遠離該水樽。

控方續指,事實上其後片段顯示,庾右手拾起了一個水樽,「我向你指出,你自己執起咗個水樽,隨時可以用嚟作出攻擊」,庾否認,強調兩個水樽顏色不同。控方再指,庾聲稱無帶武器,事實上是「就地取材」作出攻擊,庾不同意。

控方指5人出閘沒被打 「因為佢哋冇搞事」

控方指,片段見到庾身在近F及G出口的閘機位時,有5名人士如常出閘「冇俾人打」,既然該5人可以離開,庾亦可以離開。庾同意任何時間都可出閘,但他擔心出閘後被打,控方即指:「之前個5個人都好安全出到去,冇俾人打,係因為佢哋冇搞事?係咪?」庾不解何謂「搞事」,控方再指「你不能夠好似嗰5個人出閘離開,因為你之前對閘外白衣人做挑釁動作,你驚俾人打」,庾重申,他眼見白衣人一到場就稱要打付費區的人,是針對整個付費區的人。

控方質疑庾所指不合理,因該5人能夠安全出閘,沒有被針對,庾同意有人可出閘,但他不敢行出去。

被告指上前救人 「唔忍心見有人咁樣受傷」

控方稱,片段其後見閘外有十多二十個白衣人朝J及K出口方向行,庾稱當時遠處有黑衣男子遭白衣人包圍,控方聞言稱「嗰度有人士俾白衣人圍,其實同你個人冇關喎」,庾重申之所以留在付費區是覺得大家有需要互相保護,「我唔忍心見到有人咁樣受傷」,所以上前救人。

就庾第二度拾起水樽,他解釋,起初有5至6人包圍閘外的黑衣男子,當見到他面前的白衣人行向該方向,「嗰刻淨係諗到點樣阻止,咁啱見到地下有水樽」,便嘗試可否拖延時間「令佢哋遲咗去」。控方指,庾的右手向後拉,作出瞄準手勢,庾否認,形容「係拉開咗(手),利用呢個動作發力」。

控方再指,庾當時掟出水樽後急步閃避,「你根本想將水樽掟去付費區外白衣人群體,只不過你掟唔到出去咁解啫」,庾不同意,自言「我嘅運動神經冇咁差」,當陳官追問原因,庾指,當時他與閘外白衣人相距兩至三步,「正常人都掟到出去啦」,當時雖有拉弓手勢,「但我係向地下方向掟」。

陳官質疑被告 低估其他人也有救人膽量

法官陳廣池() 控方() 庾家豪(

:如果要救人,後方(即較接近黑衣男的位置)都會有人衝出去救。

:咁我心急去救人吖嘛。我冇諗到嗰度附近嘅人會唔會救佢,定袖手旁觀。

:你當時認知嘅概念,閘內嘅人係互相保護,冇可能嗰咋後方嘅人唔去救佢㗎。

:未必有人夠膽行近欄杆嗰度㗎嘛。

:點解你咁諗呢?

:我相信未必人人會咁勇敢囉,因為嗰個環境,如果我行埋去欄杆,我係會好大機會俾白衣人打中,都需要一定膽量。

:你啫係意思就話,你有咁嘅膽量,你就唔知其他人有冇咁嘅膽量。

:係。

:咁你會唔會低估其他人呢?

:都可能係,去到唔止我一個救呢位黑衣男士。

:事實上好多閘內人士,其實同你一樣都有膽量去救呢位被圍毆人士?

:又未到好多嘅,可能6、7個啦。我當時唔會考慮付費區嘅人救唔救呢位男士,而係我一心想去救呢位男士,我都唔認為企係度觀察有冇人救佢,我先去救,我應該要盡快去幫佢。

控方又問庾:「你接唔接受,你係勇字當頭衝去救人呢?」庾稱「我唔認為」。審訊明續。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明、高級檢控官岑穎欣
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們