林卓廷等涉721暴動|匿名證人認曾向白衣人拍掌又手戴紅繩 「佢哋遞過嚟俾我戴,話『你唔戴打埋你』」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,案件今(31日)在區域法院續審。匿名市民證人繼續接受辯方盤問,辯方展示相片及播放片段,顯示證人在鳳攸街與白衣人一同遊行,曾叫「保衛家園」,並質疑證人手上亦戴有以示白衣人記認的紅繩,證人解釋有人遞上紅繩,並告知「你唔戴打埋你」。辯方另播片顯示證人在元朗站向白衣人拍掌,證人否認具鼓勵意圖,亦否認與白衣人同一伙,強調「我係元朗市民,睇到佢哋其實都係保衛自己家園,覺得佢哋都係爭取番自己嘅嘢啫」。【林卓廷等涉721暴動案報道結集】

官提醒證人 毋須回答有損個人權益問題

獲頒匿名令的證人市民A女士續接受辯方盤問,代表林卓廷的大律師黃錦娟在盤問時一度指出A屬白衣人一分子,法官陳廣池應辯方要求提醒證人,批准她不回答有損個人權益的問題。

A在庭上確認案發當日先到益發大廈某商店探朋友,其後在鳳攸北街休憩處逗留約兩小時,再經形點二期前往元朗站。黃錦娟仔細問及A在鳳攸北街休憩處的所見所聞,A同意見到有人持條狀物,但不見寫有「保衛家園」的紙牌,她亦不見有人在晚上8時許在附近被打,但黃錦娟播出一名男子在鳳攸北街休憩處附近被白衣人圍毆的片段後,A便指聽到有人細聲說「打人啦,打錯咗人」,並有白衣人士聲稱該男子因無法提供元朗住址而被打。黃錦娟再問有否見到何君堯在該處與白衣人接觸,A聞言稱「應該就冇喇⋯⋯見佢同人握吓手,但應該唔係白衫」。

「我係元朗居民,嗌保衛一樣嘢,有乜出奇」

不過,黃錦娟其後播出片段,顯示A由鳳攸徑行至益發大廈,前方有人舉起寫上「保衛家園 保衛元朗」的紙牌,A曾叫喊「保衛家園」,質疑A早前作供沒有告知事實全部。A自言記性差,並無隱瞞,她指「成班市民都係爭取公義」,又反問:「如果我跟住佢地嗌保衛家園我覺得好正常,因為我係一個元朗居民,嗌保衛一樣嘢,有乜咁出奇?」

黃錦娟指出,片段見到黃四川(因7.21事件被捕)及鄧英斌(7.21暴動罪成的河瀝背村村長)進入元朗站大堂不久,A便在他們身後出現,質疑他們遊行後一同前往元朗站,A強調「唔係一齊」,亦不知二人身在前方,但同意黃四川是「朋友嘅朋友」,當晚曾與他聊天。黃錦娟續質疑,早前與A一同遊行的人士,其後不約而同抵達元朗站,包括帶白衣人上樓梯追打的程偉明,A強調不知道他們有否前去元朗站。

A重申,元朗居民「一齊行一齊保衛家園」屬正常之事,且當中不乏普通市民衣着,「咁樣嗌呢個口號冇犯法㗎嘛」。

辯方指白衣人以紅繩作記認 官稱不屬揣測

黃錦娟展示一張鳳攸徑的照片,指出A右手戴上了紅繩,A聞言稱:「佢哋遞過嚟俾我戴,話『你唔戴打埋你』。」庭上一片譁然。

黃錦娟又指出,當晚白衣人以紅繩作記認,以示同一幫人,遭控方質疑涉及揣測他人想法,但法官認為不屬揣測,批准辯方提問,A回答指「呢啲可能係佢哋嘅諗法,我自己都係保護自己,咪戴上紅色繩囉」。

黃錦娟繼續向A表示,「你仲覺得白衣人行動好值得鼓勵喎,你仲拍手掌㖭」,A聞言稱「法官呢個問題我唔想答」,黃錦娟遂指「你唔答,我哋播條片睇啦」,A看畢片段後同意「有咁嘅動作(指拍手)」,黃錦娟追問A為何要拍手、是否在行動上鼓勵白衣人。

辯方問點解拍手 證人:成功趕走咗佢哋

代表林卓廷的大律師黃錦娟(辯方

辯方:點解要拍手嘅?

證人:我就唔係同佢哋一伙嘅,我唔識佢哋,只不過我係元朗市民,睇到佢哋其實都係保衛自己家園,覺得佢哋都係爭取番自己嘅嘢啫。

辯方:你都唔知閘入面嘅人做咗咩,點知佢哋保衛家園?

證人:網上有海報,無理由一個香港人完全唔知囉⋯⋯

辯方:你唔知真定假。

證人:事實上佢哋係保護緊自己嘅地方。

辯方:邊啲行為係保護緊自己嘅地方?

證人:佢哋形態係唔想佢哋搞亂元朗、搗亂元朗,事實上好多區亂七八糟。

辯方:你行動上鼓勵佢哋?

證人:冇鼓勵意圖。

辯方:咁點解要拍手?我以為拍手就係鼓勵喎。

證人:咁佢哋起碼成功趕走咗佢哋囉。

列車停留18分鐘後才開 官要求傳召車長及站長

A堅稱以往有黑衣人及持傘者入元朗搗亂,黃錦娟遂問「喺你眼中白衣人打嗰啲人係啱嘅」?A答:「冇話打嗰啲人啱,佢哋只係阻止啫。」黃錦娟又指,白衣人衝入閘後,A能夠見到白衣人在樓梯底「係咁打人」,但A刻意淡化白衣人行為,沒有在庭上如實告知,A不同意。黃錦娟向A指出「你係白衣人一分子」,陳官聞言稱「你唔需要答」。

此外,就涉事的前往屯門列車停留18分鐘後才駛離月台,陳官今早要求控方傳召駕駛列車的車長及元朗站站長。控方今午報告進度,指其中一位站長目前不在港,但已聯絡上車長、站務經理及另一位站長,另有一位工程師將會講解車門開關。審訊明續,由辯方資深大律師潘熙盤問A。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們