林卓廷等涉721暴動|匿名市民供稱元朗站閘內有人擲物挑釁 白衣人「忍唔住跳欄入去想打佢哋」

分享文章

2019年7月21日港鐵元朗站發生襲擊事件,前立法會議員林卓廷被指與另外6名男子參與暴動,案件今(30日)在區域法院續審。獲頒匿名令的市民A女士供稱,當晚她在鳳攸北街附近見到逾50名白衣人,她湊熱鬧約兩個半小時後便前往元朗站,她在F出口見閘內有人向外射水,閘內外的人互相投擲物件,分別叫喊「入嚟吖」及「你出嚟吖」互相挑釁,但她認為閘內挑釁的感覺較強烈,「閘外就唔係好想入去嘅其實」。A女士指,在閘內者多次叫囂、以傘攻擊及擲物件後,白衣人「忍唔住之後跳欄入去想打佢哋」。【林卓廷等涉721暴動案報道結集】

證人A女士早前獲頒匿名令,她獲准在屏風後作供,為免玻璃反光,法庭亦在犯人欄上方貼上牛皮紙,部分辯方代表反映無法看到證人後,法官陳廣池批准辯方有需要時可提出申請,行前觀察證人反應。

鳳攸北街見逾50白衣人 逗留2.5小時湊熱鬧

證人A供稱,其學歷為中五程度。案發當晚8時許,她到鳳攸北街附近探朋友,其後在鳳攸北街見到許多身穿白色衫的人士,另有逾50人坐在附近公園,其間聽到有人稱「有啲人會入嚟元朗」,令她回想起早前看過的新聞及網上資訊,理解有人會入元朗「搗亂」,她自言「我比較八卦嘅,所以停留喺公園睇熱鬧」。逗留約兩個半小時後,白衣人開始散去,她便沿天橋前往形點商場二期,準備經商場到元朗站乘車回家。

A表示,她抵達元朗站F出口後便見到水柱及水花,「啲水唔知係咩嘢嚟」,故不敢行近閘機。她指,閘外約10至20人主要身穿白衣的人士在躲避水花,當閘內的人大叫「入嚟吖」,閘外的人則叫「你出嚟吖」,A認為有挑釁感覺,猶如「撩交嗌咁」。控方追問「邊個挑釁邊個」?A指閘內者挑釁閘外者的感覺較強烈,「閘外就唔係好想入去嘅其實,因為都停留咗好耐囉」,並指他們看似是觀望狀態。

感閘內挑釁較強 「閘外就唔係好想入去嘅」

A續指,閘內的人多次叫囂,她認出閘內的其中一人為林卓廷,最終20名白衣人「忍唔住之後跳欄入去,想打佢哋」,原本身處閘內的人則衝上樓梯。法官陳廣池追問為何以「忍唔住」形容,A答稱:「佢哋咁樣嘈,頂唔住走入去啩。」代表被告陳永晞的資深大律師潘熙質疑,證人涉猜度他人想法,證據價值不大,但控方認為可着證人指出事實基礎,A繼續回答,指閘內的人高叫「你入嚟啦」、以傘攻擊閘外的白衣人及投擲物件,令白衣人一方「忍唔住」。

A其後在閘外遠距離觀察到有垃圾桶被掉至樓梯,陳官質疑她為何知悉是垃圾桶,A稱「因為大件囉」,陳官聞言稱「好多嘢都大件」,A便指應該為「鐵嘅物體」,不過控方追問A能否聽到聲響,A表示「細聲,唔大聲㗎」。A續指,親眼目睹有人跑上樓梯,白衣人尾隨,未幾垃圾桶便「碌落嚟」,陳官質疑「碌」是猶如葫蘆滾地,A改稱「唔係碌,係跌」。

「軍裝」到場 「唔似警察,似啲防暴隊」

在A提到垃圾桶跌下的階段,A稱她於閘外目睹2至3個白衣人衝上樓梯,其中一人手臂流血。控方及後播出閉路電視片段,指畫面20至30名白衣人在樓梯聚集,問A有否見到一大群人聚集的畫面,A稱因當時人太多,直至人群開始散去才行近樓梯位置,因此沒有見過這畫面。

A稱,未幾有「軍裝」抵達現場,控方關注是否「軍裝警員」,A表示「唔似係警察,佢都係着制服嘅,好似啲防暴隊咁,我印象唔係警察」,控方遂問A理解防暴是甚麼人?A答指是「軍裝」,又言「記得佢冇攞盾牌,但唔似警察囉」,陳官便指「香港防暴隊,我嘅認知就係警察嚟嘅」。

A續供稱,基於擔心而不敢乘搭西鐵,同時「驚啲警察,我當佢係警察啦,唔知佢會唔會捉我問話㗎嘛」,她最終行向南生圍方向離開,全程逗留約1小時。審訊明續,A將開始接受辯方盤問。【林卓廷等涉721暴動案報道結集】

法院:區域法院
法官:法官陳廣池
被告:林卓廷、庾家豪、陳永晞、葉鑫昇、鄺浩林、尹仲明、楊朗
控罪:暴動罪

法律代表
控方:高級檢控官程慧明
辯方:大律師黃錦娟(林卓廷)、大律師李百秋(庾家豪)、資深大律師潘熙(陳永晞)、大律師鄭凱霖(葉鑫昇)、大律師周慶澎(鄺浩林)、大律師黎建華(尹仲明)、大律師曾敏怡(楊朗)
案件編號:DCCC1106/2020

如欲接收每日報道整合,請在訊息欄內填寫電郵地址

訂閱及追蹤我們