「由我準備生BB嗰一刻開始，我就已準備好分開。」
兩年前，90後夫婦John和Luna（二人名稱為化名）在一宗暴動案中認罪，分別被判囚37個月及36個月。患子宮腺肌瘤的Luna得知手術後將難以懷孕，決定入獄前產子。2023年8月，夫妻二人迎接新生命，但與兒子短暫生活兩個月後，一家三口便要分離。
上月中，團聚之日如期而至，夫妻二人憶述過去兩年多在囚期間種種，Luna每月只有兩次接觸兒子的機會，John更是無緣親眼見證兒子許多的「第一次」，但他沒錯過的，是隔着玻璃聽兒子第一次開口叫爸爸。
「親身聽到嗰下，嘩，仲要嗌得好清楚『爸爸』，因為個發音好容易，嘩，嗰下係好感動。」John至今仍難忘，在旁的Luna笑John在獄中寫信詳述當時的情景，細緻到返回監倉後如何回味，「形容勁耐，爸爸兩個字之嘛！」
如今，沒有玻璃阻隔，John實實在在觸碰到兩歲多的兒子，簡單如擁抱，令一切有了溫度。兩人感恩能趕上兒子成長至「放電」的階段，同坐一枱吃早餐、想抱緊時抱緊、睡前講故事，這些平凡不過的日常，他們正在慢慢補上。
「總之三個喺埋一齊就咩都得。」
陽光和煦的午後，和暖的風撲面而來，草地上映出一家三口的影子。兩歲大的兒子嘗試獨自落斜坡，在旁的爸媽俯身護着，又說：「想扶住就話畀爹哋媽咪聽。」
「唔跌！」
「好啦好啦，你自己嚟啦。」
隨時可伸手接住兒子，是這對新手爸媽睽違已久的時刻。
2021年初，John和Luna被控暴動的案件首度提堂，二人申請保釋被拒，短暫的還柙，令他們更加肯定彼此，John亦指「真係入獄嘅時候，我哋一定要有法律上嘅身分，就覺得一定要結婚」。Luna和應說：「佢係理性啲。」John急忙解釋：「我都好肯定呢個人，好想做一啲嘢綁住佢。」
驗出子宮腺肌瘤 入獄前生育獲母支持
某次身體檢查，Luna驗出有子宮腺肌瘤，「我要坐監喎，可能坐3年㗎喎，咁點呀？我可唔可以3年後先生？」她拋出一連串問題。
豈料醫生告知腺肌瘤生長速度難料，或可拖至3年後，亦有機會3個月後便要做手術。Luna說：「我刮咗宮之後，子宮內膜會變到好薄，就好難有BB。」
她坦言，以往沒有結婚或生育打算，遇上John之後，有了組織家庭的念頭，她不希望服刑影響日後人生規劃，而這個決定背後，還有媽媽給她的勇氣。
「佢話如果我而家唔去試，以後一定會後悔，路都係人行出嚟，頭幾年係辛苦啲，但一家人一定幫到手湊掂BB，先苦後甜啫。」
全家幅貼滿屋 印二人臉孔攬枕陪伴
Luna目標是入獄前產子及坐月，因應案件答辯的時間，她推算最遲要在2022年1月懷孕，意味只有6至7個月時間備孕，被「Deadline」追趕下，「嗰陣時都幾焦慮」，過程中曾經流產，萬念俱灰。
時間一直在倒數，直至最後一個月，抱着「有就有，冇就冇啦」的心態。
「點知我中咗！就係安排好囉所有嘢。」
兒子來到了John和Luna的身邊，二人擔心他「唔記得」父母，便託朋友拍了一輯全家幅，又把合照貼滿家中的牆壁、飯廳、睡房、玩玩具等位置，成為另一種陪伴。
床頭放了印有兩人臉孔的攬枕，兒子早晚要向攬枕說「Good Morning」及「Good Night」，是一種儀式感，Luna稱：「瞓覺就叫佢揀一個嘅，通常都係揀阿媽。」
他們準備好未來兩年計劃，包括張羅兒子何時打針、交保險費等事宜，為求減輕家人負擔。
「準備生BB一刻，已準備好分開」
「由我準備生BB嗰一刻開始，我就已準備好分開。」Luna說。
相處約兩個月後，一家三口便要面對分離，John和Luna認罪後須即時還柙，其後分別被判監37個月和36個月。
這段期間，兒子主要由婆婆照顧，婆婆每周帶他長途跋涉往監獄探訪父母。Luna每月額外有兩次機會，在監獄親子中心與兒子親身接觸，每次兩小時，但作為爸爸的John，只能隔着玻璃與兒子互動，他坦言「爭好遠」，雖說每次探訪30分鐘，但扣除等候或兒子睡着的時間，有時僅得十多分鐘互動，「我係佢爹哋，但係又好似對佢了解好少，會有少少唔開心囉」。
隔着玻璃聽兒子第一次叫「爸爸」
學轉身、學爬、學企⋯⋯無法親眼見證兒子許多「第一次」，但他第一次開口叫爸爸，John沒有錯過。
「佢第一次係嗌『爸爸』，最早學識係嗌『爸爸』先，我記得好似係半歲多啲？」Luna笑說：「3月11號囉，你寫信同我講，我Mark低咗。我以為佢嗌『婆婆』先。」
John續憶述：「我都以為係（嗌『婆婆』先），親身聽到嗰下，嘩，仲要嗌得好清楚『爸爸』，因為個發音好容易，嘩，嗰下係好感動⋯⋯我仲記得我寫信，用咗好大篇章話畀佢（Luna）聽。」他眼裏帶着笑意。
Luna不禁笑道：「形容勁耐，爸爸兩個字之嘛，由佢嘅表情、動作，佢哋點樣引導佢講呢句，跟住佢聽到有幾興奮，返到去個倉點樣回味，第二日嗰封信都仲講緊。」
兩夫婦在獄中每月只可視像通話一次，每3個月才可在探訪室隔着玻璃見面，這種同在囚中夫妻見面方式俗稱「鵲橋」，其餘時間二人透過書信來往，久而久之，養成了睡前寫信的習慣，每兩日寄一次，信件隔兩周後才到手，無奈總有「時差」。
「最搞笑係病嘅時候，14日之前病咗，14日之後我覆佢信，叫佢飲多啲水呀！」John分享道。Luna笑言，試想像如果月初「諗唔開」寄信給對方傾訴，「如果由1號等到20號先氹到我，呢20日我會死囉，應該會甩晒啲頭髮」。Luna說，所以會盡量即晚消化情緒，「唔會擺過夜」。
出獄後回家 重獲為人父母實在感
兩年多過去，隨着一封又一封的信件寄出，Luna出獄了。回家當晚，她在床上哄兩歲多的兒子入睡，猶如兩母子不曾分開一樣，Luna說：「我expect佢會唔黐我，點知佢都幾黐，可能呢啲就係阿媽同阿仔之間嘅bonding」。
上月中，一家三口團聚之日，沒有電視劇般激動的重遇，而是終於為John帶來為人父親的實在感。
回家後見到兒子熟睡的一幕，John記憶猶新，當時他難掩興奮：「終於見到佢喺我面前喇，我聞下佢啲BB味呀，我擺隻手喺佢隻手仔度呀，摸下佢隻腳仔呀⋯⋯嗰陣兩個零月，到而家兩歲多啲，嗰個Moment好特別，亦都好實在。嘩，終於可以接觸到自己個仔喇！我唔係隔住晒啲嘢去同佢互動。」
初見抗拒父親 相處兩小時終可擁抱
不過，起初兒子略為抗拒，不准他「攬攬錫錫」，他苦笑道：「嗰下酸酸地，俾人reject咗，仲要俾自己個仔reject。但我都明白嘅，始終一直冇接觸過。」幸好經兩小時相處，他終可抱實兒子，這是父子間的第一個擁抱。
訪問期間，記者與他們一家三口由商場慢步至公園，兒子堅持自己推BB車，小手拉着把手，緩緩向前走。
John一邊行一邊訴說兒子對他的親密度不如媽媽及婆婆，但二人有共同興趣，都是愛車之人，可以一同「玩車」，還有一起做家務，John說：「我都會叫佢幫手，你遞衫畀爹哋啦，爹哋掛上去。」二人的距離因此又再拉近一點點。
「爹哋！我um糖糖呀！」對話被一聲呼喚打斷。
兒子跑到John身旁蹲下，看着John鞋上的Gummy bear裝飾，伸手扮吃糖，已是他今天「吃」過的第N顆糖，John耐性依舊，溫柔回應道：「你um啦！」
話音剛落，又傳來一句：「拖住拖住！」John笑稱：「好多呢啲Moment，佢又會主動嗌爹哋，呢啲位好sweet。」
兩父子大手牽小手，捉緊彼此，也在捉緊溜走的時間。
一起早餐睡前說故事 重拾溫馨日常
抵達公園後，兒子的目光被滑梯吸引，在旁整理BB車的Luna即向John喊話：「喂，你看住佢啦！」
她笑指，每晚床前說故事，「叫佢揀自己鍾意嘅書，問佢今晚想邊個講，通常都係我，佢（John）冇乜機會」，深知兩父子需時建立關係，「多數我會留返畀爹哋同佢玩」。
一家團聚不足一個月，兩夫婦日日帶兒子外出，Luna感恩能趕上兒子成長至「放電」的階段，「兩歲之後就真係體力勞動好大，我媽真係吃不消，啱啱好我哋就出嚟喇，所有嘢都係整定」。她又說，自懷孕以來，媽媽一同學習現代育兒心得及飲食，陪她出入產檢，更提早退休湊孫，「一直都好放心有媽咪呢個後盾，佢真係好犀利好強大，一直撐住我同我老公」。
至於已錯過的兩年，她沒有過份執着：「我又冇失落喎，兩年前就會知道會miss呢兩年㗎啦。我媽、家姐、公公、婆婆全部都有參與⋯⋯我參與唔到係事實，總之我見到佢健健康康就好OK。」
同坐一枱吃早餐、到公園「放電」、想抱緊時抱緊、隨心舉機自拍、睡前講故事，這些平凡不過的日常，他們正在慢慢補上。
每天在等她的，還有洗衫、洗奶樽、吸塵等家務事，有別於入獄之前，「而家even我覺得攰，個心係幾舒服」。看着兩父子盪鞦韆，Luna說：「我好愛你哋，超愛你哋。你愛嘅人喺度就OK，就乜都得。」
轉眼間，累透的兒子跑到Luna身旁，她趕緊遞上水樽：「飲水水啦。」兒子急忙喝了兩口，欲跑走之際，Luna即說：「飲多一啖！」眼見兒子乖乖補充水份，她一臉欣慰。
計劃渡蜜月 為拍婚照準備減肥
被問到之後的打算，兩夫婦異口同聲提到渡蜜月，各自要減肥和操Fit，以最佳狀態拍結婚照。此時，John望向兒子：「我哋渡蜜月，個Trip冇你份呀！」
Luna提到沒有為兒子報讀N班：「畀佢玩下先啦，佢6歲都要返小一，感受下佢住嘅地方先囉。」John亦不求兒子有何學業成就，「最緊要快樂同健康」。
他又指：「而家係最好嘅Moment，佢啱啱好識行，我哋就返返嚟佢身邊，見證之後嘅路⋯⋯總之三個喺埋一齊就咩都得。」
天色漸暗，兒子看似「放電」完畢，兩人找尋換尿片的地方，一家三口準備前往下一個目的地。
後記：
這天步出商場，遇上午後陽光，一切剛好。記者在回家路上抬頭一看，這晚的月亮尤其圓。
如欲接收每日報道整合，請在訊息欄內填寫電郵地址
